Túrkistanda «Aqyldy shamdar» shyǵaratyn zaýyt salynady
TÚRKІSTAN. QazAqparat - Búgin Túrkistan qalasyndaǵy ındýstrıaldy aımaqta jaryqshamdar shyǵaratyn zaýyttyń kapsýlasy salyndy, dep habarlaıdy QazAqparat tilshisi.
Saltanatty is-sharaǵa Túrkistan oblysynyń ákimi Janseıit Túımebaev pen Qytaıdyń «Tai-Tur Energy» JShS-niń dırektory Chen Hýeı jáne «Source Energy» kompanııasynyń baqylaýshylar keńesiniń jetekshisi Oralbek Botbaı qatysty.
Buǵan deıin qytaılyq ınvestordy oblys ákimi Janseıit Túımebaev arnaıy qabyldap, sol kezdesýde ekijaqty memorandýmǵa qol qoıylǵan bolatyn. Jıynda óńir basshysy Túrkistan oblysynda ınvestorlarǵa qolaıly jaǵdaı jasalǵanyna toqtaldy. Óndiristi damytýǵa, jumyssyzdyqty azaıtýǵa baǵyttalǵan jobalardy birlesip atqarýǵa daıyn ekenin jetkizdi.
«Túrkistan - elimizdegi turǵyndar sany kóp oblystardyń biri. Munda kásipkerlikti, óndiristi damytýǵa zor múmkindik bar. Jumys kúshi de, ınvestorlarǵa arnalǵan qoldaý da jetkilikti. Indýstrıaldy aımaqtan arnaıy 5 gektar jer berilip otyr. Zaýyttyń qurylysy ýaqtyly ári sapaly júrgizilýi tıis», - dedi Janseıit Túımebaev.
Aıta keteıik, «Tai-Tur Energy» - Qytaı Halyq Respýblıkasyndaǵy eń bedeldi kompanııalardyń biri. Bul kompanııanyń dıodty ári elektrúnemdegish jaryqshamdary Qytaıdyń iri qalalarynda qoldanysqa engizilgen. Kósheler men iri magıstraldardy jáne alyp ǵımarattardy jaryqtandyrý isinde úlken jetistikke jetken. Jobalary da aýqymdy. Atalǵan kompanııa elimizde birinshi ret Túrkistan oblysyna ınvestıtsııa salýǵa qol jetkizip otyr. Jobanyń ınvestıtsııanyń quny - 200 mln AQSh dollaryn quraıdy.
Al, Túrkistandaǵy ındýstrıaldy aımaqta irgetasy qalanǵan kompanııanyń qurylysy 3 jylda aıaqtalady dep kútilýde. Osy arqyly bastapqyda 700 adam jumyspen qamtylmaq. Suranys pen óndiris qýattylyǵyna saı jumysshylar sany artýy múmkin. Zaýyttyń ónimderi Qazaqstannan bólek kórshiles memleketterge de eksporttalady dep kútilýde.
