Túrkistanda ákimdik karantın kezinde onlaın tirkeýdiń jeńil júıesin qoldanýda
TÚRKІSTAN. QazAqparat - Túrkistan qalasy ákimdigi karantın ýaqytynda qalada eldiń kelip-ketip, júrip-turýyn onlaın tirkeýdiń qolaıly ári jeńil júıesin engize bastady. Atalǵan shara «Astana memlekettik qyzmet haby» qoldaýymen júzege asýda, dep habarlaıdy QazAqparat.
«Hab óz mıssııasyna saı ınnovatsııalyq sheshimderdi zerdeleý negizinde birqatar elderde pandemııa kezinde qoldanylǵan jańa tehnologııalar týraly málimetterdi memlekettik organdarǵa beredi. Máselen, Ázerbaıjan, Grekııa, Birikken Arab Ámirligindegi azamattardyń qozǵalysyn tirkeıtin onlaın júıeler týraly aqparatty Qazaqstan úkimetine, mınıstrlikterine, mekemeler jáne ákimdikterge joldaǵan. Túrkistan qalasy ákimdigi ázerbaıjandyq tájirıbeni qoldanyp, azamattardyń qozǵalysyn tirkeıtin onlaın júıeni jasap shyqty. Onyń kómegimen Túrkistan turǵyndary mynadaı maqsattar boıynsha júrýge onlaın rejımde ruqsat ala alady: azyq-túlik taýarlary men dári-dármek satyp alý; shuǵyl medıtsınalyq jáne emdeý qyzmetterin alý; halyqtyń tynys-tirshiligin qamtamasyz etý uıymdaryna jumysqa shyǵý; aza tutý protsesine qatysý. Bul ınnovatsııalyq sheshimdi Ázerbaıjan Prezıdenti janyndaǵy Azamattarǵa qyzmet kórsetý jáne áleýmettik ınnovatsııalar boıynsha memlekettik agenttigi Hab suraýy boıynsha usynǵan», - delingen baspasóz baıanynda.
«Túrkistan ákimdigi bastamasy - azamattardyń múddesi úshin aqparattyq tehnologııalardy qoldanýdyń úlgisi. Bul sheshim halyqaralyq tájirıbe men bilim almasýdyń mańyzdylyǵyn taǵy bir márte kórsetip otyr», - dep atap ótedi Astana memlekettik qyzmet haby Basqarýshy komıteti tóraǵasy Álıhan Baımenov.
Pandemııa jaǵdaıynda jańashyl ıdeıalardy engizý boıynsha aqparat almasýdyń aıryqsha mańyzdylyǵyn eskerip, Hab arnaıy onlaın platforma jasady. Jahandyq qaýip-qaterge toıtarys berýde praktıkter Alıanstary qatysýshylaryn osy vırtýaldy alańda ınnovatsııalyq sheshimder, ádis-tásilder, qoldanbaly tehnologııalarymen bólisip otyrýǵa shaqyrady.
Bul rette Ázerbaıjan, Armenııa, Qazaqstan jáne Koreıa Respýblıkasynan saraptamalyq materıaldar kelip tústi. Onda tsıfrlandyrý, medıtsına, qashyqtyqtan oqytý jáne ekonomıka salasynda Úkimetter men IT-kompanııalardyń pandemııaǵa qatysty qabyldaǵan sharalary qamtylǵan. Bul materıaldar Habqa qatysýshy-elder arasynda taratylady. Budan basqa, Hab saıtynda (Coronavirus (COVID-2019) derekter bazasy quryldy. Onda koronavırýs pandemııasyna baılanysty statıstıkalyq kórsetkishteri jáne basqa da faktilermen birge memleketterdiń esepteri bar.
