Túrkistanda abattandyrý jumystary qarqyndy júrgizilýde
TÚRKІSTAN. QazAqparat – Oblys ortalyǵy Túrkistandy túletý baǵytynda qazir qala aýmaǵy 32 sektorǵa bólinip, barlyǵynda abattandyrý jumystary qarqyndy júrgizilip jatyr. Aımaq basshysy Ómirzaq Shókeevtiń tapsyrmasymen qala aýmaǵy aýdan-qala ákimdikter men mekemelerge bólinip berilgen bolatyn, dep habarlaıdy QazAqparat tilshisi.
Keles aýdany men Túrkistan qalalyq memlekettik satyp alý bóliminiń enshisine berilgen 16-shy sektorda «ıAssy», «Baıanaýyl», «Qarashyq» móltek aýdandary ornalasqan. Sektor boıynsha jalpy jer kólemi 850 gektardy qurasa, ondaǵy úılerdiń sany – 1317-ge jetip otyr. 4 myńnan asa turǵyn mekendeıtin aýmaqta 47 kóshe bar. Qazirgi tańǵa deıin 16- sektor aýmaǵynda 6260 dana aǵash kóshetteri otyrǵyzylyp, jas daraqtardyń tólqujat men kartasy jasalǵan. Egilgen tal-daraqtar búginde tolyǵymen «Jasyl Túrkistan» KMM-niń qaraýyna ótkizilip, olar tehnıka arqyly sýarylýda.
Sondaı-aq, jaryqshamdar men qoqys jáshikteri, oryndyqtar men aıaldamalardy ornatý jumystary bekitilgen is-shara josparyna sáıkes júrgizilýde. Tipti dızaınderiniń birkelki bolýy da baqylaýǵa alynǵan.
Sektor aýmaǵyndaǵy ǵımarattardyń qasbetterin retke keltirý jóninde menshik ıelerine túsindirý jumystary júrgizilýde. Qazirgi tańda 120 turǵyn úı, 3 kásipkerlik nysannyń qasbetteri retke keltirilgen. Qasıetti Túrkistan qalasyn kógaldandyrýǵa Keles aýdanynan 15 adam, jergilikti turǵyndardan 5 adam turaqty jumysqa tartylǵan. Tazalyq jumystaryna 3 tehnıka jumyldyrylǵan. Qaladaǵy Rýhanııat kóshesiniń boıynan jastardyń bos ýaqytyn tıimdi ári kórikti ótkizýi úshin alleıa soǵylýda. Qazirgi tańda alleıa aýmaǵyna aıaq joldar tóselip, dekoratıvti aǵash kóshetteri men gazon egilýde. Jýyq arada jańa alleıa el ıgiligine beriledi.
