Túrkistanda 89 turǵyn úı bıýdjet esebinen salynyp jatyr
TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistandaǵy qurylys alańdaryn aralap, jumysshylarmen kezdesti. Óńir basshysy tutastaı ashyq tústi travertın men aq mármár taspen qaptalyp jatqan kóppáterli turǵyn úılerdiń qasbetin kórip shyqty, dep habarlaıdy QazAqparat tilshisi.
Qurylys jumystarynyń sapasyn teksergen aımaq basshysy merdiger kompanııa ókilderine qurylys qarqynyn jyldamdatýdy tapsyrdy. Ómirzaq Estaıuly qurylys basynda saqtyq sharalaryn kúsheıte otyryp, táýlik boıǵy jumys kestesine kóshýdi mindettedi.
«Jumys kólemi óte aýqymdy, ony jaqsy túsinemin. Biraq qazir kidiretin kez emes. Jumys barysynyń mańyzy men jaýapkershilikti sezine bilý qajet. Bizdiń tarapymyzdan qandaı da bir kómek kerek bolsa, tikeleı aıtyńyzdar»,-dedi óńir basshysy.
Túrkistan qalasy ákimshilik-iskerlik ortalyǵynda 7,9,12 qabatty 89 turǵyn úıdiń qurylysy bıýdjet esebinen júrgizilýde. Jyl qorytyndysymen 7 qabatty 24 baspana, ıaǵnı 1452 páterli úıdi tapsyrý josparlanǵan.
Bul úılerden 450 páter birinshe kezekte turǵan áleýmettik osal toptarǵa jáne kópbalaly otbasylarǵa berilse, memlekettik qyzmetkerlerge 1000-nan astam kredıttik turǵyn úı tapsyrylmaq.
