Túrkistanda 825 adam kásiptik daıarlyqtan ótpek

TÚRKІSTAN. QazAqparat – Túrkistan qalasynyń ákimdiginde shahar basshysy Rashıd Aıýpovtyń tóraǵalyǵymen aptalyq májilis ótti, dep habarlaıdy QazAqparat tilshisi.Májilistiń kún tártibinde tórt másele qaralyp, qosymsha bıýdjettiń ıgerilý boljamy da keńinen aıtyldy.

Sala mamandarynyń málimetinshe, oblys ortalyǵynda 2800 páterlik 75 kópqabatty úı bar. Onyń 1219-y tabıǵı gaz paıdalansa, 1241 páterge ishki montajdaý jumystary júrgizilgen. Qalǵan 340 páterge gaz qubyry tartylmaı, gaz ballondaryn paıdalanady. Qala basshysy muny eskere otyryp, barsha turǵyndardyń tabıǵı gazdy tutynýyn qadaǵalaýdy tapsyrdy.

Jıynda sondaı-aq, Jumyspen qamtý jáne áleýmettik baǵdarlamalar bólimi basshysynyń mindetin atqarýshy M.Kazıhanov turǵyndardy jumyspen qamtý sharalary boıynsha negizgi kórsetkishterdiń jospary men oryndalý barysyn baıandap ótti.

Onyń dereginshe, qala boıynsha jalpy 3686 adam áleýmettik sharalarmen qamtylǵan. Onyń ishinde sanattary boıynsha jumyssyzdar – 1327, ózdigimen jumyspen qamtylǵandar – 627, al jumys izdeýshiler – 1252 adamdy qurap otyr.

«Eńbek» memlekettik baǵdarlamasy sheńberinde tehnıkalyq, kásiptik bilimmen jáne qysqy merzimdi qaıta daıarlaýǵa jalpy 825 azamat josparlanǵan. Nátıjesi 100-den joǵary paıyzdy qamtyp otyr. Naqty aıtsaq, olar aspaz, daıashy, elektromonter, dánekerleýshi, qurylys sheberi, tiginshi syndy mamandyqtar boıynsha orta arnaýly oqý oryndarynda bilim alýǵa joldanǵan»,- dedi bólim basshysyniń mindetin atqarýshy.

Májiliste sonymen qatar, ákim apparaty, qurylys, jumyspen qamtý jáne áleýmettik baǵdarlamalar, turǵyn úı kommýnaldyq-sharýashylyq, jolaýshylar kóligi jáne avtomobıl joldary bólimine qatysty jergilikti bıýdjettiń boljamdy ıgerilýi boıynsha da aqparat aıtyldy.