Túrkistanda 8 myń gektar aýmaqqa aǵash otyrǵyzyldy

TÚRKІSTAN. QazAqparat - Túrkistan qalasynyń jasyl aýmaǵynda jemis aǵashtary, sonyń ishinde alma men almurt, órik pen shıe kóshetteri otyrǵyzylyp jatyr, dep habarlaıdy QazAqparat oblys ákiminiń baspasóz qyzmetine silteme jasap.

Jyl saıyn otyrǵyzylatyn kóshetter alańy aýqymdanyp, kóne shahar jasyl qalaǵa aınalyp keledi. Qalany baý-baqshaǵa bóleýge baý baptaǵan baǵbandar atsalysýda. Oblys ákimi Ómirzaq Shókeev qalanyń abattandyrý jáne kógaldandyrý jumystaryn tekserdi. Dál osy maqsatta qala 32 sektorǵa bólingen bolatyn. Árqaısysy boıynsha aýdan, qala ákimdikteri men basqarma basshylary jaýapty.

Barlyǵynda bekitilgen is-shara jospar boıynsha qyzý jumys júrip jatyr. Qala qoqystan tazartylyp, gúlzarlar jańarýda. Jaýapty sektor jetekshileri jaryq shamdar qoıyp, oryndyqtar men qoqys jáshikterin ornatylyp jatyr. Retsiz turǵan beton qadalar men tas tireýishterdiń orny tegistelip, jańartylǵan. Aıaqjoldar men velo joldar tóselip, aınalasyna kóshetter egildi. Sýburqaqtar ornatylyp, jańadan aıaldamalar qoıylǵan. Sondaı-aq, sektor jaýaptylary avtoturaqtardy retke keltirip, taldardyń túpterin qopsytýda. Qalada turaqty túrde senbilikter ótedi.

Qazirgi tańda Túrkistan mańynda 8 myńǵa jýyq gektar jerge aǵash otyrǵyzylǵan. Kóne shahardyń «jasyl beldeýiniń» jalpy kólemi eki ese artpaq. Túrkistanmen birge qalyptasyp, birge boı kótergen «jasyl beldeýge» barǵan Ómirzaq Estaıuly egilgen kóshetterdiń sýarylýyna asa mán berýdi qadap aıtty.

«Shahar tutastaı kógaldandyrylady. Túrkistan naǵyz jasyl qalaǵa aınalyp keledi. «Jasyl beldeý» - halyqtyń taza aýamen tynystanýyna múmkindik beretin «ókpesi» bolady. Qalany jelden, shańnan qorǵaıtyn kópjyldyq aǵashtar otyrǵyzyldy. Bul keler urpaǵymyz úshin de ónege bolyp qala bermek. Jalpy, qalada saıabaqtar men gúlzarlar kóbeıip, el ıgiligine berilgen. Turǵyndar tazalyqty saqtaýdy óz aýlasynan bastap, janashyrlyq tanytsa, búgingi jasalyp jatqan dúnıeler jyldar boıy saqtalary sózsiz»,-dedi oblys ákimi.

Túrkistan aýmaǵynda qala klımatyna tez beıimdeletin ekpe kóshet jáne kópjyldyq gúldeıtin shópter suryptalǵan. Atap aıtqanda, emen, qaıyń, usaqjapyraqty shegirshin, úlken japyraqty shegirshin, qaraǵaı, jińishke japyraqty jıde, terek, úıeńki, qytaı shaǵany, salǵylt qaraqat jáne basqa aǵashtar otyrǵyzyldy.