Túrkistanda 7 qabatty 10 turǵyn úıdiń shatyry balalar alańyna aınalady
TÚRKІSTAN. QazAqparat - Túrkistan qalasyndaǵy 7 qabatty 10 turǵyn úıdiń shatyry balalarǵa arnalǵan oıyn alańyna aınalady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Baspasóz qyzmetiniń málimetterine qaraǵanda, oblys ákimi Ómirzaq Shókeev oıyn alańshalarynyń eń sapaly qurylys materıaldarynan salynyp, qaýipsizdiktiń qatań saqtalýyn myqtap mindettedi.
Aıta ketý kerek, atalǵan joba arnaıy memlekettik saraptamadan ótip, maquldandy. Aımaq basshysy jaýapty basqarma basshylarymen birge ákimshilik-iskerlik ortalyqta salynyp jatqan turǵyn úılerdi aralady. Munda 7,9 jáne 12 qabatty jalpy 89 turǵyn úıdiń qurylysy júrip jatyr. 7 qabatty 7 úıdiń qurylys-montaj jumystary aıaqtalyp, bank arqyly berilgen. 7 qabatty 24 turǵyn úıdiń aýmaǵyna sý, gaz, elektr qýaty men káriz júıesimen jabdyqtaý jáne turǵyn úı aýmaǵyn abattandyrý jumystary júrgizilýde. Basym bóliginde arnaıy jerasy avtoturaqtar bolady. Kópqabatty úılerdiń gaz qazandyqtaryn ornatý jáne ishki árleý jumystary júrip jatyr.
Qaladaǵy qurylys alańdaryn aralaǵan oblys ákimi Ómirzaq Estaıuly «Áziret Sultan murajaı-qoryǵynyń» aýmaǵyn abattandyrý jumystarynyń barysymen tanysty. Jalpy aýmaǵy 7,7 ga. jerde 4 kezeńnen turatyn aýqymdy jumystar júrip jatyr. Botanıkalyq baq, eki birdeı alleıa, dekoratıvti toǵan qurylysy qarqyndy júrýde. Jospar boıynsha munda myńǵa jýyq tal otyrǵyzylady.
Germanııa jáne Belgııa elderinen arnaıy ákelingen kóshetter, Ózbekstannan satyp alynǵan tut, qaraǵaı, shıe, alma aǵashtary, kashtan egiledi. Sondaı-aq, 18 myń butalar men Germanııadan satyp alynǵan 14 myń landshafty jáne alpınıstik raýshan gúlderi men sý lalagúlderi egiledi. Topyraqty qunarlandyrý úshin sala mamandary keshendi jumystar júrgizip jatyr. Saıabaqtar jaryqtandyrylyp, tastar tóselip, kesene aýmaǵy oazıske aınalady.
Túrkistan qalasynda bıylǵy jyly ashylǵan Halyqaralyq Týrızm jáne meımandostyq ýnıversıtetiniń aınalasy abattandyrylýda. Bıik baǵanalar ornatylyp, jan-jaǵy kógaldyndyrylýda. Tarıhı – mádenı ortalyq aýmaǵyndaǵy Túrkistan kómekshi mektep-ınternatyn qaıta qurý boıynsha qurylys-montaj jumystary tolyq aıaqtalǵan. Oqý korpýsy jáne jataqhana paıdalanýǵa berýge daıyn.
