Túrkistanda 570 oryndy kópsalaly aýrýhana paıdalanýǵa beriledi
TÚRKІSTAN. QazAqparat - Túrkistan qalasynda bıyl 200 orynǵa shaqtalǵan modýldik kópbeıindi aýrýhanasy paıdalanýǵa berildi, dep habarlaıdy QazAqparat.
Sondaı-aq, oblys ortalyǵynda keler jyly da 570 oryndy kópsalaly aýrýhana el ıgiligine tapsyrylady dep kútilip otyr.
Bul týraly brıfıngte oblystyq qoǵamdyq densaýlyq basqarmasynyń basshysy Marat Pashımov málimdedi.
Onyń sózinshe, jalpy óńirde basqarmaǵa qarasty 43 medıtsınalyq uıym bar.
«Memleket tarapynan densaýlyq saqtaý salasyna kóp kóńil bólinip, tıisti deńgeıde qarjylaı qoldaý kórsetilip jatyr. Máselen, aımaqtaǵy medıtsınalyq ǵımarattardyń tozýy 58,1 paıyzdy quraǵan bolatyn. Osyǵan baılanysty 2020 jyly oblystyq bıýdjetten aýdan-qalalardaǵy emhanalar men aýrýhanalardy kúrdeli jóndeýden ótkizý úshin 809,5 mln teńge bólindi. Nátıjesinde 2021 jyly 5 nysan jańartylsa, 7 nysanda jóndeý jumystary júrgizilýde. Odan bólek, memlekettik-jekemenshik áriptestik aıasynda 7 feldsherlik-akýsherlik pýnktterdiń qurylys jumystary atqarylyp jatyr», – dedi Marat Pashımov.
Sonymen qatar, basqarma basshysy 2020 jylǵy jalpy transfert esebinen 2,5 mlrd teńge qarjy bólinip, RB -238 dana, JB - 2828 dana medıtsınalyq tehnıka satyp alynǵanyn jetkizdi.
Birinshi kezekte ana men bala, jansaqtaý, ota jasaý qyzmetin kúsheıtýge jumsalǵan.
Al, bıyl 2 KT apparat, anestezıologııa jáne reanımatsııa bólimshelerin jaraqtandyrý maqsatynda - 392 dana, ana men bala bólimine - 87 dana medıtsınalyq tehnıka alynǵan.
Oblystyń bas dárigeri óńirdiń epıdemıologııalyq jaǵdaıyna da toqtaldy.
Búginge deıin oblys halqynyń 93 paıyzy nemese 973 852 adam koronavırýs indetine qarsy ekpeniń І komponentin saldyrǵan, al 895 859 azamat ІІ komponentin qabyldaǵan.
Osyndaı kórsetkishpen Túrkistan oblysy vaktsınatsııa boıynsha respýblıkada birinshi orynǵa shyqqan.
Aıta keteıik, óńirdegi medıtsınalyq uıymdarda jalpy 24 340 maman jumys istese, onyń 5 496-i - dárigerler, 18 844-i - orta býyn qyzmetkerleri.
Olardyń bilimin jetildirý maqsatynda byltyr 1 694 dáriger, 928 orta býyn qyzmetkerdiń bilimi jetildirilgen.
2021 jyly - 1212 dáriger, 1300 orta býyn qyzmetkeri bilimin jetildirilgen.
