Túrkistanda 500 túlek ýnıversıtette tegin oqıtyn boldy

TÚRKІSTAN. QazAqparat - Túrkistandaǵy Halyqaralyq qazaq-túrik ýnıversıtetinde Túrkııa kvotasyn jeńip alǵan talapkerlerge tegin bilim sertıfıkaty tabys etildi, dep habarlaıdy QazAqparat ýnıversıtettiń aqparat ortalyǵyna silteme jasap. 

Qoja Ahmet ıAsaýı atyndaǵy Halyqaralyq qazaq-túrik ýnıversıtetine Túrkııa Respýblıkasy tarapynan 500 grant oryndary bólindi. Bul - UBT men keshendi testileýden joǵary upaı jınap, alaıda Qazaqstan grantyna ilige almaǵan talapkerlerdiń bilim alýyna berilgen úlken múmkindik.

Bilimdi jastarǵa Túrkııa grantyn úlestirgen oqý orny daryndy talapkerlerge basymdyq berip otyr. Áleýmettik qoldaý kórsetýge baǵyttalǵan bilim sertıfıkattary halyqaralyq jáne respýblıkalyq pándik olımpıadanyń 34 jeńimpazyna, Álem, Azııa, respýblıka deńgeıinde júldeger atanǵan 10 sportshy jas jetkinshekke, sondaı-aq, 10 tul jetimge berildi. Olardyń qatarynda Elaman Baltabaev, Ábdiǵanı Bıbarys, Áýbákir Mádı, Dıana Raımova, Moldash Kemelbek sekildi bolashaǵynan zor úmit kúttirgen sportshylar men   «Aqberen», «Ata-jurt», «ıAsaýı», «Dintaný» halyqaralyq, respýblıkalyq pán olımpıadalary men músháıralarynyń jeńimpazdary bar. Al, qalǵan bilim granttary UBT men keshendi testten joǵary upaı jınap, memlekettik grantqa iline almaǵan bilimdi jastarǵa úlestirildi.

Sondaı-aq, ýnıversıtet túlekteri Nurtaza  Kókenov,  Erbol Shalanov jáne  Erkin Jaqypov syndy azamattardyń atynan úsh stýdentke 300 myń teńgeniń sertıfıkaty tabystaldy.   

Aıta keterlik taǵy bir jaıt, Ahmet ıAsaýı ýnıversıteti óńir halqynyń áleýmettik jaǵdaıyn eskere otyryp, bıyldan bastap bilim alý tólemaqysyn tómendetip otyr.