Túrkistanda 5 myńnan astam adam qulshylyq etetin sáýletti meshit salynýda
Oblys basshysy Ómirzaq Shókeev qalaǵa kireberiste salynyp jatqan meshit qurylysynyń basynda boldy. Álemdegi ozyq tájirıbelerdi ushtastyrǵan jáne sáýleti erekshe Islam ortalyǵynyń ishki jáne syrtqy bezendirilýi shyǵystyq naqyshta júrgizilmek.
Biregeı jobaǵa Ózbekstan prezıdenti Shavkat Mırzıeev qoldaý kórsetip otyr. Túrki áleminiń rýhanı temirqazyǵy, qasıetti Túrkistan qalasynda salynyp jatqan aýqymy 5 myń sharshy metrdi alatyn jańa ǵıbadat ornynda túrkistandyq jamaǵat sájdege bas tıgizip, qulshylyq ete alady. Syrtqy aýmaǵyna 3 myń adam sııady. Meshittiń qurylysy zaman talabyna saı ozyq úlgide júrgizilýde.
Sáýletti ǵımaratta musylmandyq joralardy jasaıtyn oryndar, kongress-holl, neke saraıy, 180 oryndyq medrese, kitaphana, ashana, sport alańdary, 500 oryndyq avtoturaq pen ǵajaıyp sýburqaqtar bolady.
Aıta keteıik, Túrkistan oblysynyń ortalyǵynda boı kótergen birneshe nysannyń qurylysy aıaqtalýǵa jaqyn. Basym kópshiliginde ishki árleý, ınjenerlik jelilerin montajdaý jáne syrtqy abattandyrý jumystary júrgizilýde. Qurylys jumystary eki aýysymda júrgizilýde.
Qaladaǵy rýhanı-mádenı ortalyqta túrik ınvestorlary memlekettik-jekemenshik áriptestik aıasynda salyp jatqan kóne sáýlet óneriniń kózi – «Kerýen saraı» týrıstik kesheniniń qurylysy aldaǵy kúzde aıaqtalady dep josparlanǵan.
Kıeli shaharda sondaı-aq, álemde teńdesi joq aspan astynda qalqyǵan teatr, jergilikti qolóner sheberleriniń ashyq bazarlary, erekshe sáýletti sýburqaqtar men santúrli ult ókilderiniń dámhanalary men demalys oryndary salynýda.
