Túrkistanda 5 mln teńgeniń múlkin jymqyrǵan ury qolǵa tústi

TÚRKІSTAN. QazAqparat - Shardara aýdany polıtsııa bólimine jergilikti turǵyn aryzdanyp kelgen. Onyń aıtýynsha, turǵyn úıine bógde adam tereze arqyly kirip, jatyn bólmesindegi baǵaly altyn, brıllıant áshekeı buıymdary men 1 mıllıon teńgeden astam aqshasyn jymqyryp ketken, dep habarlaıdy QazAqparat.

Aımaqtaǵy polıtsııa departamentiniń málimetinshe, jábirlenýshige keltirilgen shyǵyn kólemi 5 mıllıon teńgeden asty.

«Atalǵan jaıt QR QK-niń 188-baby «Urlyq» boıynsha tirkeýge alyndy. Shardaralyq qyraǵy polıtseılerden quralǵan jedel-tergeý toby oqıǵa ornyna baryp, kýálardan jaýap aldy. Nátıjesinde jınaqtalǵan aqparat kózderi arqyly kúdiktiniń jeke basy anyqtaldy. Ol buryn jábirlenýshiniń úıinde qurylys jumystaryn júrgizgen jergilikti turǵyn bolyp shyqty», - dep jazdy vedomstvodan.

Belgili bolǵandaı, kúdikti er azamat jábirlenýshiniń úıinde altyn buıymdarynyń baryn bilip, óziniń jeke bas paıdasy úshin jymqyrǵan. Búginde qoldy bolǵan baǵaly áshekeıler óz ıesine qaıtaryldy.

Qazirgi tańda atalǵan jaıtqa baılanysty sotqa deıingi tergeý amaldary júrgizilýde.