Túrkistanda 5 adamnyń gazdan ýlanyp kóz jumýy: Sot otyrysy bastaldy
TÚRKІSTAN. QazAqparat - Túrkistanda gazdan ýlanyp, bir otbasynyń 5 múshesi mert bolýyna baılanysty sot otyrysy bastaldy. Alǵashqy sot otyrysynda turǵyn úıge gaz qubyrlaryn kirgizgen jáne jalǵan tehnıkalyq qujat jasaǵan eki fırmanyń basshysyna aıyp taǵyldy, dep habarlaıdy QazAqparat tilshisi.
Aıyptaý aktisin oqyǵan prokýrordyń málimetinshe, eshbir jerde istemeıtin eki dánekerleýshi sol úıge gaz qubyrlaryn kirgizý jumystaryn júrgizedi. Alaıda shymkenttik fırma dırektory ol jumystardy kórmesten-aq barlyǵyn talapqa saı etip, qujattaryn jasap bergen. Ekinshi aıyptalýshy da qubyrlar talapqa saı ornatylǵan jáne qaýipsizdik erejeleri saqtalǵan dep tehnıkalyq qujat jasap bergen bolyp shyqty. Sonymen qatar elimizde ruqsat etilmegen ıran peshin ornatqanyn jasyryp, tipti úıge gaz ıisin anyqtaıtyn arnaıy qurylǵy qoıylǵan dep qujatqa jalǵan málimetter toltyrǵany anyqtalǵan. Qazir eki kompanııa basshylaryna qatysty Qylmystyq kodekstiń 306 baptyń úshinshi bóligi jáne 385- shi bapty 1-shi bóligi boıynsha aıyptar taǵylýda. Olardyń kinálári dáleldense, tórt jyldan segiz jylǵa deıingi merzimge bas bostandyǵynan aıyrylýy múmkin.
Eske salaıyq, Túrkistanda 27-shi aqpan kúni jeke úılerdiń birinen 41 jastaǵy anasy men tórt perzentiniń máıiti tabylǵan bolatyn. Arnaıy júrgizilgen sot-medıtsınalyq saraptama qortyndysy marqumdardyń ólimine gazdan ýlaný sebep bolǵanyn anyqtaǵan.
