Túrkistanda 30-ǵa jýyq áleýmettik jáne kásipkerlik nysan salynady
TÚRKІSTAN. QazAqparat - Túrkistan oblysynyń ákimi Janseıit Túımebaev óńirdegi birqatar sáýletshilermen kezdesip, Túrkistan qalasyn damytý máselesin jan-jaqty talqylady, dep habarlaıdy QazAqparat.
Aımaqtyń baspasóz qyzmetinen málim etkendeı, jıyn barysynda Janseıit Túımebaev Túrkistan qalasyn túrki áleminiń mádenı-rýhanı ortalyǵy retinde damytý boıynsha bas jospar tujyrymdamasyn ázirleý konkýrsy uıymdastyrylǵanyn atap ótti.
«Qalamyzdy týrıstik ortalyqqa aınaldyrý maqsatynda uıymdastyrylǵan baıqaýǵa otandyq jáne sheteldik mamandar qatysty. Atap aıtqanda, Túrkııa, Ońtústik Koreıa, Ózbekstan elderinen 42 kásibı sáýletshiler baqtaryn synady. Biraq, hattamaǵa sáıkes 22 joba joldandy. Olarǵa qoıylyp otyrǵan basty talap, qaladaǵy jańa qurylys sáýlet stıli jergilikti ulttyq salt-dástúrge saı bolýy tıis. Sondaı-aq, qalanyń barlyq tusynan Qoja Ahmet ıAsaýı kesenesi kórinip turýy kerek. Munymen másele sheshilmeıdi. Túrkistan oblysynyń qaryshtap damýy bizdiń eren eńbegimizge tikeleı baılanysty. Sondyqtan, el erteńi úshin, balalarymyzdyń bolashaǵy úshin ortaq jumystardy atqaryp, jan-jaqty qosylýymyz qajet», - dedi Janseıit Túımebaev.
Sondaı-aq, oblys ákimi Túrkistan qalasynda Elbasynyń usynysymen birqatar Ulttyq kompanııa, bıznes ókilderi men sheteldik ınvestorlar 30-ǵa jýyq áleýmettik jáne kásipkerlik nysan salatynyn jetkizdi. Odan bólek, joba aıasynda týrıster men jergilikti halyqqa qyzmet kórsetetin meıramhanalar, dámhanalar men arbattar salynbaq. Búginde boı kóteretin nysandardyń eskızdik jobalaryna halyqaralyq konkýrs jarııalanǵan. Óńir basshysy sáýletshilerdi qalany damytýǵa baılanysty usynys bildirýge jáne jarııalanǵan baıqaýǵa belsendi qatysýǵa shaqyrdy.
