Túrkistanda 264 otbasyǵa páter kilti tabystaldy
ASTANA. QazAqparat - Túrkistan qalasynda elimizdiń Táýelsizdik kúni merekesine tartý retinde halyq ıgiligine jańadan 264 páterli 9 qabatty eki jáne 5 qabatty eki turǵyn úı tapsyryldy, dep habarlaıdy OQO ákimdiginiń baspasóz qyzmeti.
Jańadan boı kótergen «Otyrar» shaǵyn aýdanyndaǵy qonys toıǵa oblys ákimi Janseıit Túımebaev arnaıy qatysyp, túrkistandyqtardy Egemendigimizdiń 25 jyldyq merekesimen quttyqtap, turǵyndarǵa páter kiltin tabystady.
«Halyqty turǵyn úımen qamtamasyz etý maqsatynda túrki dúnıesiniń ortalyǵy sanalatyn kóne Túrkistanda birqatar jumystar atqarylýda. Bul baǵyttaǵy jumystar aldaǵy ýaqytta da jalǵasyn taýyp, kezekte turǵan kóptegen azamattar baspanaly bolary sózsiz. Dál qazirdiń ózinde osy shaǵyn aýdanda 8 úıdiń qurylysy júrgizilip jatyr. Keleshekte jańa aýdanda memleket esebinen 100 kópqabatty úı jáne áleýmettik nysandar salý josparlanyp otyr. Bul shırek ǵasyrda Elbasynyń kóregendi saıasatynyń arqasynda qol jetkizgen jetistiktiń bir parasy ǵana», - dedi oblys ákimi.
Aıta keteıik, atalǵan shaǵyn aýdandaǵy 5 qabatty qos úıdiń qurylysy oblys bıýdjeti esebinen júrgizilse, 9 qabatty eki úı «Báıterek» Holdınginiń enshiles uıymy «Qazaqstan Ipotekalyq Kompanııasy» AQ-nyń esebinen salynǵan. Sonymen birge, jańadan boı kótergen turǵyn úılerdiń ınjenerlik ınfraqurylymdarynyń qurylysyna 586,6 mln. teńge qaralyp, tıisti jumystar júrgizilgen.
Búgingi tańda Túrkistan qalasynda turǵyn úı alý úshin 4232 azamat ótinish bildirgen. Olardyń ishinde 3019 álsiz toptaǵy, 203 jetim balalar bolsa, 1010 memleket qyzmetkeri men 10-nyn úıi apatty jaǵdaıdaǵy azamattar quraıdy.
