Túrkistanda 2000 jylǵy mektep túlekteri muqtaj synyptasyna úı salyp berdi

TÚRKІSTAN. QazAqparat - Túrkistan oblysynda mektep túlekteri aqsha jınap, muqtaj otbasyna úı salyp berdi, dep habarlaıdy QazAqparat.

«Bekzat» móltek aýdanynda mektepti 2000 jyly bitirgen túlekter synyptasyna baspana salyp berdi.

4 bólmeli jańa úı Jarqynbek Sabyrovtyń ózi turyp jatqan shańyraǵynyń aýlasynan turǵyzylǵan.

Qonys toıyn toılaǵan azamat - 4 perzenttiń ákesi. Ata-anasymen birge turady.

Densaýlyǵyna baılanysty jumysqa jaramsyz.

Qarjy tapshylyǵy qolbaılaý bolyp, birazdan beri tozyǵy jetken úıdi panalaýǵa májbúr bolǵan.

«Qurdasymyzdyń úıi eskirgen. Bilýimizshe, óziniń kúrdeli jóndeý júrgizýge múmkindigi joq. Sondyqtan 1983 jyly týǵan azamattar ózimiz aqyldasa kele kómek qolyn sozýdy jón kórdik. Qurylys jumystary bir jylǵa sozyldy. Alla sátin salyp, barlyǵy jasparlaǵanymyzdaı júzege asyryldy»,-deıdi uıymdastyrýshylardyń biri Іzbasar Esekeev.

Úı ıesiniń qaıyrymdylyq jasaǵan qurdastaryna aıtar alǵysy sheksiz.

Onyń sózinshe, qatarlastarynan mundaı qadam kútpegen. Aýla qorshaýynyń jańartylǵanyna da dán rıza.

Aıta keteıik, mundaı ıgi iske 1982 jyly týǵan azamattar bastamashy bolǵan.

Naqtyraq aıtqanda, 2019 jyly turmysy tómen synyptastaryna úı salyp bergen.

Іzgi amaldy jalǵaǵan 20 jyldyq túlekteri kelesi jyly qaıyrymdylyq aktsııasyn 1984 jyly týǵan azamattarǵa joldady.