Túrkistanda 200 orynǵa laıyqtalǵan modýldi juqpaly aýrýlar aýrýhanasy salynýda
NUR-SULTAN. QazAqparat - Túrkistan qalasynda 200 tósek-orynǵa laıyqtalǵan modýldi juqpaly aýrýlar aýrýhanasynyń qurylysy júrip jatyr, dep habarlaıdy oblystyq ákimdiktiń baspasóz qyzmeti.
Bıyl elimizde 13 modýldi ınfektsııalyq statsıonar salynýy josparlanǵan bolsa, sonyń biri Túrkistan shaharynda.
Aıta keterligi, 200 tósek-orynnyń 180-i ınfektsııalyq juqpaly aýrýlarǵa, al 20 oryn reanımatsııalyq aýrýlarǵa arnalǵan. Aýrýhanada tsıfrly rentgen apparaty, ýltradybystyq apparattar jáne ózge de ozyq úlgidegi tehnıkalar emdelýshilerge qyzmet etetin bolady.
Nysannyń qurylysy josparlanǵan aımaqta barlyq qajetti ınjenerlik jeliler men kólik ınfraqurylymy bar. Jalpy, ınfektsııalyq statsıonardyń qurylys jumystary qarasha aıynda aıaqtalatyn bolady.
