Túrkistanda 200-ge tarta eldi mekendi damytý jobalary ázirlendi
TÚRKІSTAN. QazAqparat - Túrkistanda 200-ge tarta eldimekenniń damytý syzbasy ázirlenip, 2019 jyly óńirdegi 188 aýyldy kórkeıtýdiń shemalary daıyndalady. Bul týraly búgin Óńirlik kommýnıkatsııalar qyzmetinde oblystyq sáýlet jáne qala qurylysy basqarma basshysynyń mindetin atqarýshy Baqtybaı Dúısebekov aıtty, dep habarlaıdy QazAqparat tilshisi.
2018 jylda atqarylǵan jumystar barysyn baıandaǵan Baqtybaı Dúısebekov ótken jylǵa josparlanǵan kóptegen mindetter oryndalyp, oǵan qazynadan bólingen 66 mln 027 myń teńge tolyqtaı ıgerilgenin atap ótti. Máselen, ótken jyly oblystaǵy 77 eldi mekendi damytý úshin qurylys syzbalary jasalǵan. Aımaqta 110 qurylys nysany boıynsha tıisti mekemelermen shara qoldanyp, 129 qurylys obektisi boıynsha jumystar atqarylýda.
«Oblys aýmaǵyndaǵy 500 eskertkish anyqtalyp, irikteldi. Onyń ishinde 100 nysannyń tizimi oblystyq mádenıet basqarmasymen birlesip jasaldy. Sonymen qatar, oblystyq sáýlet jáne qala qurylysy basqarmasynyń tarapynan tómendegi eskızdik jobalar ázirlendi. Olar - oblys kartasyna ornalasqan tarıhı nysandardy ashyq aspan astyndaǵy maketteriniń jobasy, oblys boıynsha aýdan ortalyqtaryndaǵy salynatyn «Dostyq úıi», Qazyǵurt aýdany boıynsha «Qazyǵurt - keme qalǵan» tarıhı-etnografııalyq kesheniniń jobalary jasalyp usynyldy. Olardy 2019 jyly iske asyrý josparlanǵan. Ordabasy aýdany boıynsha «Ordabasy» memorıaldyq tarıhı-mádenı keshenin abattandyrý. Úsh bıdiń eskertkishi ornatyldy. 2019 jylǵa abattandyrý jumystaryn jalǵastyrý josparlanǵan», - dedi Baqtybaı Dúısebekov.
BAQ ókilderimen kezdesýde basqarma basshysy Túrkistan oblysynyń jańa gerbine qatysty jarııalanǵan konkýrs ótkizý boıynsha aqpar berdi. Onyń sózinshe, 2018 jyldyń 5 qyrkúıek kúni konkýrs jarııalanyp, oblystyq bıýdjetten júlde qoryna 1 mln teńge bólingen. Baıqaýǵa 50 avtor óz usynystaryn berse, solardyń ishinen 3 jumys iriktelip alyndy. Bul jumystar jalpy daýysqa salynyp, úzdigi tańdaldy. Onyń avtorlary J.Túımebaev, E.Tólepbaı, A.Jaılaýbaev (Almaty qalasy) bolǵan.
Al, jańa jyldaǵy negizgi kúshti basqarma basshylyǵy Túrkistan qalasynyń bas josparyn ázirleýdi aıaqtaýǵa baǵyttalǵan. Eń birinshi kezekte, topografııalyq túsirilimderdi aıaqtap, syrty kólik - áýe tasymaly, temirjol, avtokólik joldary máselesin retteýge, qalaǵa irgeles aýmaqtardy kógaldandyrý boıynsha syzba ázirleý syndy negizgi jumystarǵa kóńil bólýdi qarastyryp otyr.
