Túrkistanda 2 myń lıtr naýryz kóje daıyndalyp, 500 keli baýyrsaq úlestirildi

TÚRKІSTAN. QazAqparat - Búgin Túrkistan oblysynyń jurtshylyǵy Ulystyń uly kúnin Túrkistan qalasynda toılady. «Esim han» alańynda ótken merekelik sharada óńirdiń tanymal ónerpazdary, stýdentter men mektep oqýshylarynan quralǵan jalpy 2000-ǵa jýyq adam óz ónerlerin kórsetti, dep habarlaıdy QazAqparat tilshisi.

Saltanatty jıynǵa oblys ákimi Ómirzaq Shókeev arnaıy qatysyp, óńir turǵyndary men qonaqtaryn aıtýly merekemen quttyqtady.

«Túrkistan oblysynda Naýryz merekesi 14 naýryzdan bastaldy. Oblysymyzda ár kúnge ártúrli at berilip, maǵynaly ári mazmundy is-sharalar, jalpyhalyqtyq serýender ótti. Kóshetter otyrǵyzylyp, qalany kórkeıtý jumystary jandandy. Ulttyq kıim men dástúrli án-kúılerimiz nasıhattaldy. Búgingi merekeni paıdalana otyryp, barshańyzdy Túrkistandy gúldendirýge úles qosýǵa shaqyramyn. «Yntymaq júrgen jerde, yrys birge júredi» degen maqal bar. Birligimiz myqty, elimiz tynysh bolsa, Túrkistanymyzdyń keleshegi jarqyn bolatyny sózsiz. Barshańyzdy Ulystyń Uly kúni - Naýryz merekesimen shyn júrekten quttyqtaımyn», - dedi Ómirzaq Shókeev.

Merekelik sharada jyl basynyń bastalýyn kórsetetin teatrlandyrylǵan qoıylym qoıyldy. Sondaı-aq, etnoaýylda oblystaǵy aýdan-qalalar kıiz úıler tigip, ulttyq taǵamdardan dastarqan jaıyldy. Jurtshylyqqa 500 keli baýyrsaq úlestirildi. Qonaqtar úshin 2000 lıtr naýryz kóje daıyndalyp, 1,5 tonna palaý basyldy. Odan bólek, qolónershiler jasaǵan túrli ulttyq buıymdardan kórme uıymdastyryldy.