Túrkistanda 155 memqyzmetshi ákimshilik aıyppul tóledi

TÚRKІSTAN. QazAqparat - Byltyr Túrkistan oblysynda 155 memlekettik qyzmetshige ákimshilik aıyppul salyndy, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, aımaqta Ádep kodeksiniń talaptaryn buzǵany úshin 45 memqyzmetshi tártiptik jazaǵa tartylǵan.

«Bıylǵy 22-aqpanda memlekettik qyzmetshilerge arnalǵan Ádep kodeksiniń jańa redaktsııasy bekitildi. Máselen, endi memqyzmetshilerge ádep standarttary úshin jazalaý tek qyzmettik ádep normalaryn buzǵanda ǵana júzege asyrylmaq. Jalpy, basshydan bastap barlyq qyzmetkerler birdeı memlekettik qyzmetshige teńestiriledi. Jańa kodekste memlekettik qyzmetshilerdiń ádep normalaryna 6 qaǵıdat engizildi. Atap aıtqanda, adal nıettilik, adaldyq, ádildik, ashyqtyq, sypaıylyq, klıentke baǵdarlaný», - dedi Túrkistan oblysy ákimi apparatynyń ádep jónindegi ýákili Maqsat Isaev.