Túrkistanda 154 sharýa qojalyǵy bir jerden eki ret ónim almaq
TÚRKІSTAN. QazAqparat - Túrkistan oblysy Túlkibas aýdanynyń sharýalary bıyl jyl boıyna egistikke eki ret kókónis túrlerin otyrǵyzdy. Ondaǵy maqsat – mol ónim jıyp alý, dep habarlaıdy QazAqparat.
Óńirlik kommýnıkatsııalar qyzmetinen málim etkendeı, byltyr osy jańashyl ádisti tájirıbe retinde synap kórgen birqatar sharýa tabyspen shyqqan.
Al bıyl qyzyǵýshylyq tanytqan dıqanshylar qatary artqan.
Búgingi tańda bir jerden eki ónim alatyn 154 sharýashylyqtyń tizimi jasaldy. Jalpy kólemi 265,33 ga jerge qyzanaq, qııar, júgeri, noqat, sarymsaq, kartop kókónisterin otyrǵyzyp, mol ónim alý kózdelýde. Aýdandyq aýyl sharýashylyǵy bólimi mamandarynyń boljamyna sáıkes, 1-shi ónim 1721,3 tonna, al 2-shi ónim kólemi 4358,0 tonnaǵa jýyqtaıdy.
«Túlkibas aýdanynda aýyl sharýashylyǵy jáne jappaı kásipkerlikti damytý baǵytynda aýqymdy jumystar iske asyrylýda. Qazirgi tańda aýdan ákimdiginiń tıisti derbes bólimderi men kent, aýyldyq okrýg mamandary tarapynan óz kásibin ashýǵa qyzyǵýshylyq bildirgen turǵyndarǵa jan-jaqty qoldaýlar kúsheıtilgen. Sonymen qatar, sýarmaly jerlerdi ulǵaıtý maqsatynda da júıeli sharalar iske asýda», - delingen málimette.
