Túrkistanda 150-den astam otbasyǵa azyq-túlik sebetteri taratyldy
TÚRKІSTAN. QazAqparat - Túrkistan qalasynda az qamtylǵan 150-den astam otbasyǵa azyq-túlik sebetteri úlestirildi. Qasıetti Ramazan aıyndaǵy ıgi iske «Túrkistan oblysy boıynsha jaýyngerlik óner qaýymdastyǵy» zańdy tulǵalar birlestiginiń ujymy men «Nur Otan» partııasynyń Túrkistan oblystyq fılıaly birlesip uıytqy boldy, dep habarlaıdy QazAqparat tilshisi.
«Nur Otan» partııasynyń Túrkistan oblystyq fılıaly tóraǵasynyń birinshi orynbasary Beısenbaı Tájibaevtyń aıtýynsha, jaqsylyqqa jany qumar jandardyń bul áreketi — kópke úlgi bolarlyqtaı. Taǵylymy mol is-shara respýblıkalyq «Biz birgemiz» aktsııasy aıasynda óz jalǵasyn tabýda. Turmysqa qajetti as-sýdy taratýǵa «Jas Otan» jastar qanatynyń belsendi jastary men eriktiler de járdem berdi. Qaıyrymdylyq sharanyń sharapatyn kórgen jandar uıymdastyrýshylarǵa alǵystaryn bildirdi.
«Óńirdegi turmysy tómen januıalarǵa azyq-túlik sebetterin tabystaýdy dástúrge aınaldyrdyq. Árıne, qaıyrymdylyq sharasyn eldiń alǵysyn alý úshin uıymdastyryp otyrmyz. Budan bólek, qaladaǵy saıabaqtarǵa kóshet otyrǵyzyp, oblys ortalyǵyn jasyl qalaǵa aınaldyrýǵa atsalysyp kelemiz. Maqsatymyz — qalanyń gúldenýine úlesimizdi qosyp, turǵyndardyń áleýmettik jaǵdaıyn arttyrýǵa kómek berý», - deıdi «Túrkistan oblysy boıynsha jaýyngerlik óner qaýymdastyǵy» zańdy tulǵalar birlestiginiń basshysy Dáýren Táńirbergenov.
