Túrkistanda 15 óńirdiń ákimdigi birqatar nysandardyń qurylysyn júrgizedi
TÚRKІSTAN. QazAqparat - Túrkistanǵa arnaıy saparmen kelgen QR Premer-Mınıstriniń birinshi orynbasary Asqar Mamın oblys ákimdiginiń májilis zalynda ótken jıynǵa qatysty. Oblys ortalyǵyn damytý máselesi talqylanǵan basqosýǵa óńir ákimi Janseıit Túımebaev pen ózge de oblys basshylarynyń orynbasarlary, ulttyq kompanııa ókilderi men ınvestorlar jınaldy, dep habarlaıdy QazAqparat tilshisi.
Jıynda sóz alǵan óńir basshysy Janseıit Túımebaev Memleket basshysynyń Túrkistan qalasyn damytý jónindegi tapsyrmasyn oryndaý boıynsha atqarylyp jatqan jumystar jaıyn baıandady. Onyń sózinshe, qazirgi tańda Ákimshilik-iskerlik ortalyqta 672 gektar jerden 513 gektar jer memlekettik menshikke alynǵan. Olardyń ishinde 48,4 gektar aýmaqta ornalasqan birinshi kezekte salýynýy tıis 13 nysannyń jer telimderi tolyǵymen bosatylyp, 7 nysannyń qurylysy bastalǵan. Al, 88 bes qabatty turǵyn úılerdiń qurylysy boıynsha (2 724 páter, 200 myń sharshy metr) daıyndyq jumystary aıaqtaldy.
«Turǵyn úı qurylysy «Túrkistan ÁKK» qatysýymen jeke salýshylar esebinen júzege asyrylady. Sondaı-aq, Astana qalasynyń tapsyrysy boıynsha «Astana» alańy salynatyn bolady. Onyń qurylys jumystary aǵymdaǵy jyldyń naýryz aıynda bastalyp, 2020 jyldyń jeltoqsan aıynda aıaqtalady. Sonymen qatar, Túrkistan qalasynyń rýhanı-mádenı aımaǵynda «UÁQ Samuryq qazyna» AQ tapsyrysymen Qoja Ahmet ıAsaýı murajaı nysanynyń qurylysy bastaldy. Budan ózge, áýejaıdyń qurylysy boıynsha jumystar atqarylýda. QR Indýstrııa jáne ınfraqurylymdyq damý mınıstrliginiń Azamattyq avıatsııa komıteti, QR Qorǵanys mınıstrligi jáne «Kazaeronavıgatsııa» AQ maquldaǵan Túrkistan qalasyndaǵy áýejaıdy salý úshin 905,3 gektar jer telimi bólinip otyr», - dedi óńir basshysy.
Sondaı-aq, basqosýda QR Mádenıet jáne sport mınıstri Arystanbek Muhamedıuly Kúltóbe tarıhı ornyn jańǵyrtý boıynsha baıandama jasady. Jıynda ózge oblys pen qala basshylyǵy ókilderi ózderine tapsyrylǵan nysandardyń qurylysy jóninde habardar etti. Almaty oblysynyń ákimdigi «Jastar saraıy» ǵımaratynyń qurylys jumystaryn bastalǵanyn jetkizse, Aqtóbe oblysy - «Áziret Sultan» qoryǵynda mádenı-demalys nysandary salynyp jatqanyn atap ótti. Atyraý oblysy - ashyq aspan astyndaǵy mádenı-tarıhı murajaıdyń qurylysyn bastamaq. Al, Shyǵys Qazaqstan oblysy - áýendi sýburqaq salýdy kózdep otyr. Soltústik Qazaqstan oblysy - olımpıadalyq rezervti daıyndaıtyn oblystyq sport mektebin salýdy josparlap otyr. Jambyl oblysy - «Áziret Sultan» qoryǵyna mádenı-tarıhı vızıt ortalyǵyn turǵyzbaq. Batys Qazaqstan oblysy - Tarıhı-kıeli oryndar ortalyǵynyń qurylysyn júrgizedi. Budan ózge, Qostanaı oblysy - Qazaqstan Halyqtary Assambleıasynyń ǵımaratyn, Qyzylorda oblysy - Shyǵys monshasyn, Mańǵystaý oblysy - Amfıteatrdyń qurylysyn bastaıdy. Elordasy Astana qalasy - «Astana» alańynyń, Almaty - Medıa ortalyqtyń, Shymkent qalasy - Oblystyq ǵylymı-ámbebap kitaphanasynyń qurylysyn bastaýda.
Jıyn sońynda QR Premer-Mınıstriniń birinshi orynbasary Asqar Mamın baıandamashylar kótergen máseleler nazarǵa alynatynyn aıtyp, Elbasy tapsyrmasy boıynsha Túrkistan qalasyn damytý úshin jaýaptylarǵa qurylysty qarqyndatýdy tapsyrdy.
