Túrkistanda 14 jasar qyz áleýmettik jelide tanysqan jigitpen kezdesýge Shymkentke qashyp ketken
TÚRKІSTAN. QazAqparat - Úıinen shyǵyp ketip, iz-tússiz joǵalǵan 14 jasar qyz Shymkent qalasynan tabyldy, dep habarlaıdy QazAqparat Túrkistan oblystyq polıtsııa departamentine silteme jasap.
Túrkistan qalasynyń polıtsııa basqarmasyna jergilikti turǵyn áıel aryzdanyp, 14 jasar qyzynyń iz-tússiz joǵalyp, tabylmaı jatqanyn habarlaǵan. Alǵashqyda ata-ana qyzdy óz betinshe týystarynyń úıinen izdegen. Aqyry nátıje shyqpaǵan soń polıtsııa qyzmetkerleriniń kómegine júgingen.
Atalǵan jaıtty birden tirkeýge alǵan polıtsııa 8-synyp oqýshysyn tabý úshin ýchaskelik polıtseıler men jedel ýákilderdi tartady. Olar taksı júrgizýshilerinen, kórip nemese bilýi múmkin degen adamdardan surastyrdy. Sonymen qatar qyzdyń áleýmettik jelidegi paraqshalaryna arnaıy mamandar arqyly shyǵyp, qyzdyń júrgen jerin topshylaıdy.
Osyndaı jedel sharalardyń arqasynda túrkistandyq polıtseıler qyzdyń áleýmettik jelide jigitpen tanysyp, Shymkent qalasyna óz erkimen qydyryp ketkenin anyqtady.
Tártip saqshylary qyzdy megapolısten taýyp, aman-esen úıine jetkizdi. Qýanyshtan kózderine jas alǵan anasy men ákesi qyzdarynyń din aman tabylǵanyna qýanyp, polıtseılerge erekshe alǵysyn jetkizdi.
