Túrkistanda 1200 adamdy jumyspen qamtıtyn tigin fabrıkasy salynady

TÚRKІSTAN. QazAqparat - Túrkistan oblysynyń ákimi Ómirzaq Shókeev Ózbekstan Respýblıkasy Prezıdentiniń tapsyrmasymen kelgen delegatsııamen kezdesti. Basqosý barysynda eki tarap Túrkistan qalasyndaǵy ındýstrıaldy aımaqta tigin fabrıkasyn salý máselesin kóterdi, dep habarlaıdy QazAqparat oblys ákiminiń baspasóz qyzmetine silteme jasap.

Nátıjesinde oblys ortalyǵynda jańa kásiporyn ashylyp, 1200 adam jumyspen qamtylatyn boldy.

«Elbasynyń Jarlyǵymen Túrkistan oblysy qurylǵan bolatyn. Bıyl Túrkistan oblys mártebesine ıe bolǵanyna 2 jyl. Kıeli shaharǵa týrısterdi tartý úshin kóp jumys atqarylýda. Túrkistannyń damýyna memleket tarapynan da erekshe kóńil bólinip keledi. Qalanyń ınfraqurylymyn jańartý, jańa ınvestıtsııalar tartý jáne týrızm salasyn jedel damytý boıynsha belsendi jumystar júrgizilip jatyr», – dedi Ómirzaq Shókeev.

Óz kezeginde Ózbekstan Respýblıkasy Prezıdentiniń keńesshisi, Tótenshe jaǵdaılar mınıstri Týrsınhan Hýdaıbergenov tigin tsehyn ashyp, tabysy tómen jáne múmkindigi shekteýli áıelder men qyz-kelinshekterdi jumysqa qabyldaýdy josparlap otyr.

Tigin fabrıkasynda kostıým, syrt kıim men sport kıimderi tigiletin bolady. Alǵashqy ınvestıtsııany Ózbekstan memleketi salyp, mamandary óz tájirıbesimen bólisetindigin jetkizdi.

Qonaqtar issapar barysynda qalaǵa kireberiste boı kótergen álemdegi ozyq tájirıbelerdi ushtastyrǵan meshit qurylysynyń basynda boldy. Sáýleti erekshe Islam ortalyǵynyń ishki jáne syrtqy bezendirilýi shyǵystyq naqyshta júrgizilmek.

Biregeı jobaǵa Ózbekstan Respýblıkasynyń Prezıdenti Shavkat Mırzıeev qoldaý kórsetip otyr. Kórshi Ózbekstan memleketiniń Túrkistanǵa tartýy retinde salynyp jatqan meshittiń qurylysyn kúzde aıaqtaý kerektigin aıtty.

Oblys ákimi qurylys qarqyny men sapasyna basa nazar aýdarý qajettigin eskertip, qurylys bekitilgen kestege saı aıaqtalýyn júktedi.

Ózbekstan Respýblıkasynan kelgen delegatsııa ókilderi qurylys alańdaryn aralap, shahardyń erekshe kórkine qyzyǵýshylyq bildirdi.