Túrkistanda 114 mln teńge sýbsıdııanyń zańsyz berilgeni áshkere boldy
ShYMKENT. QazAqparat - Túrkistan qalalyq prokýratýrasy «Agrobıznes-2020» baǵdarlamasynyń oryndalý zańdylyǵy men onyń tıimdiligine tekserý jumystaryn júrgizdi. Nátıjesinde 114 mln teńge sýbsıdııanyń zańsyz berilgeni áshkere boldy, dep habarlaıdy QazAqparat tilshisi.
Oblystyq prokýratýranyń málimetinshe, aýylsharýashylyǵy bóliminde talaptyń kúsheıtilgenine qaramastan, agroónerkásiptik keshendi damytýǵa qaralǵan sýbsıdııa qarjysyn jymqyrý, sharýalarǵa zańsyz sýbsıdııa berý jáne bekitilgen Ereje talaptarynyń saqtalmaýy jıi oryn alǵan.
Sonymen birge, ózgeniń jer ýchaskesiniń qujattaryn paıdalanyp, kópjyldyq jemis-jıdek daqyldaryn otyrǵyzý arqyly sýbsıdııa alǵan 2 sharýa qojalyǵynyń alaıaqtyq áreketi anyqtaldy. Osy derek boıynsha 4 qylmystyq is qozǵalyp, tergep-tekserý amaldary júrgizilýde. Al, jaıylymdyq jer ýchaskesiniń nysanaly maqsatyn buzyp, ol jerge kópjyldyq jemis daqyldaryn otyrǵyzǵan sharýa qojalyqqa qatysty ákimshilik is qozǵaldy.
Qalalyq jer ınspektsııasy oǵan QR ÁQBtK-niń 339 baby negizinde ákimshilik shara qoldanyp, aıyppul saldy. Qazirgi tańda kórsetilgen zańbuzýshylyqtardy joıyp, tıisti shara qoldaný týraly Túrkistan qalasy ákiminiń atyna usynys engizilgen. Kináli dep tanylǵan 6 tulǵa tártiptik jaýapqa tartyldy.
