Túrkistanda 100 shaqty kóshe jóndelip jatyr - Ómirzaq Shókeev
TÚRKІSTAN. QazAqparat - Túrkistanda 100 shaqty kóshe jóndelip, aıaqjoldar men shamdar jáne sol kóshe mańyndaǵy úılerdiń de sharbaqtary jańaratyn bolady. Bul týraly óńir basshysy Ómirzaq Shókeev jýrnalıstermen kezdesýinde atap ótti, dep habarlaıdy QazAqparat tilshisi.
Oblys ákiminiń aıtýynsha, Túrkistandy tez arada kógaldandyrýǵa asa mán berilip otyr. Oǵan qala turǵyndary jumyla atsalysýy qajet. Ákim baspasóz máslıhaty kezinde halyq kókeıindegi qoǵamdyq kólikterdiń máselesin de nazardan tys qaldyrmady.
«Rasynda qaladaǵy qoǵamdyq kólikter syn kótermeıdi. Shaharda 270 shaqty avtobýs bar. Onyń jartysy óte eski. Sondyqtan jeke joba usynǵandarǵa talap qoıyp jatyrmyz. Bul salada básekelestikti kóbeıtý kerek. Bıyldyń ózinde jańa 30 avtobýs alaıyn dep otyrmyz», - deıdi Ómirzaq Shókeev.
Óńir basshysynyń sózinshe, qalanyń ortalyǵynda ornalasqan bazarlar men beı-bereket saýda ortalyqtary salynyp ketken. Sonyń bári endi retke keltiriletin bolady.
«Saýda ortalyqtarynyń nemese bazarlarda órt shyǵatyn bolsa nemese basqa da jaıttar oryn alatyn bolsa kóp adam zardap shegýi múmkin. Bul rette bazardy syrt jaqqa shyǵarýdy tıisti mamandarǵa eskertip aıtqanmyn. Bazar ıeleri de túsinistik tanytyp, kóshirýge ruqsatyn berdi. Olar qala shetinen qolaıly jer qarastyrýymyzdy surady. Endi biz jer bólemiz. Ortalyqtan syrt betke, jańadan salynatyn áýejaı jolyna qaraı kóshiriledi»,- dedi oblys ákimi.
