Túrkistanda 100-ge jýyq jer teliminiń ıesi baǵalaý qorytyndysyna kelisim berdi

TÚRKІSTAN. QazAqparat - Túrkistan qalasyn kórkeıtý jáne kesene mańynan «Rýhanı-mádenı ortalyq» aımaǵyn keńeıtýge qajetti jerdi daıyndaý maqsatynda memleket muqtajdyǵy úshin 168 (14 kásipkerlik, 154 turǵyn úı) nysan memleketke qaıtarylady, dep habarlaıdy QazAqparat oblys ákimdiginiń baspasóz qyzmetine silteme jasap.

«168 nysannyń baǵalaý jumystary 2, 025 mlrd teńgeni quraǵan. Atalǵan nysandardyń 95 menshik ıesi kelisim berip, olarǵa 1,139 mlrd teńge tólenedi. 44 nysannyń menshik ıesi kelisim berýden bas tartýyna baılanysty sotqa talap-aryz joldanýda. Qalǵan 29 nysannyń ıesimen kelissóz júrip jatyr. Baǵalaý jumystaryn memlekettik satyp alý zańyna sáıkes, «Ekspo Otsenka» JShS júrgizdi», - delingen habarlamada.

Baǵalaý somasyna kelispegen turǵyndardyń narazylyq bildirýine baılanysty oblys ákimi azamattardy qabyldap, tıisti túsindirý jumystaryn júrgizdi.

Buǵan deıin qala basshysy osy jaıtqa qatysty birneshe ret turǵyndarmen kezdesken bolatyn. Qazirgi tańda 29 adamnan qurylǵan arnaıy shtab menshik ıelerimen jumys jasaýda.

Jumys tobynyń nátıjesinde ústimizdegi jyldyń 28 qańtaryna deıin 95 menshik ıesiniń kelisimi tolyǵymen alynǵan. Bul kelisimi alynǵandardyń ishinen 41 menshik ıesine memleketten 471 mln. teńge qarjy tólenip, onyń ishinde búgingi kúnge deıin 28-nysan buzyldy.

Buzý jumystaryna ákimdik tarapynan kómek toby qurylyp, arnaıy tehnıkalar men jumysshy toby qurylys materıaldaryn turǵyndardyń qalaǵan meken-jaılarǵa jetkizip berýde.

Sonymen qatar, jer telimderi men jyljymaıtyn múlik ıeleriniń arasynda túsindirý jumysyn júrgizý úshin jáne olardy baspanamen qamtamasyz etý joldaryn qarastyrý úshin arnaıy 14 jumysshy top qurylǵan. Osy toptyń jumys nátıjesinde qaladaǵy 500-ge tarta satylatyn jeke úı anyqtalyp, menshik ıelerine usynystar jasalyp otyr. Qala boıynsha satylatyn úılerdiń 90 paıyzy 10-20 mln teńge aralyǵynda.

Túrkistan qalasynda jerdiń ár sotyǵynyń kadastrlyq quny 88 myń teńge bolsa, turǵyndarǵa naryq baǵamy boıynsha 515 myń teńge berilip otyr. «Sondaı-aq, turǵyn úıdiń qurylys materıaldarynyń túrine, sapasyna (kirpish, qysh, shlakoblok, shıfer, irgetasy t.b.) qaraı árbir sharshy metrine bergen 55 pen 90 myń teńge aralyǵyndaǵy baǵasyna kelispeı otyrǵan 44 menshik ıesi bar. Olarǵa qala ákimdigi jáne prokýratýrasynyń mamandarymen kezdesý ótkizip, memlekettiń usynǵan qarjysyna kelispegen jaǵdaıda jeke baǵalaýshy jaldaı alatyndyǵy jáne sheshimin sotqa usynýǵa quqyly ekenindigi túsindirildi», - delingen habarlamada.

Keıbir turǵyndar tarapynan úı qujattarynda oryn alǵan qatelikterdi qaıta rásimdeýge ákimdik tarapynan zań talaptaryna sáıkes keńester berilip, qoldaý kórsetilýde.