Túrkistanda 100-ge jýyq kóshe jóndeledi
TÚRKІSTAN. QazAqparat - Túrkistan oblysynyń ákimi Ómirzaq Shókeev pen qala ákimi Rashıd Aıýpov oblys ortalyǵyndaǵy qurylys jáne jol jóndeý jumystaryn tekserdi, dep habarlaıdy QazAqparat.
Túrkistanda búginde 5, 7, 9 jáne 12 qabatty turǵyn úıler salynýda. Elimizdegi tótenshe jaǵdaı men karantın rejımine qaramastan qalada qurylys jumystary toqtaǵan emes. Kestege saı júrgizilýde. Degenmen, jumysshy kúshinde áli de tapshylyq bar. Oblys ákimi Ó. Shókeev qalany damytý, kórkeıtý aıasynda salynyp jatqan nysandardyń mańyzdy ekenin aıtyp, jumysshylar sanyn kóbeıtýdi jaýapty mamandarǵa tapsyrdy.
«Qalanyń basty kósheleriniń biri B. Sattarhanov dańǵylynyń eki shetinde uzynnan salynyp jatqan jelilik saıabaq - sýburqaqtar, erekshe dızaındy landshaftar jáne ırrıgatsııalyq aryqshalarymen erekshelenbek. Sonymen qatar, ortasha jóndeý jumystary júrgiziletin 100-ge tarta kósheniń 26-na tasjol salynsa, 22-de jumystar júrip jatyr. Jalpy 48 kóshede joldyń irgesin nyǵyzdaý, káriz júıesi qudyqshalarynyń deńgeıin kóterý syndy jumystar júrgizilýde», - dedi Túrkistan oblysy ákiminiń baspasóz qyzmetinen.
Aımaq basshysy B. Sattarhanov dańǵyly jáne dańǵyldyń ishki joly, Jibek joly, O.Datqa, Bógen, Saparbaı bolys, Kelinshektaý, Shoıynbet bı, Syrym batyr, Aqan seri, Maılyqoja, Júınekı kóshelerin aralyp, onda atqarylyp jatqan isterdi pysyqtady. Jaýapty basshylarǵa birqatar tapsyrma berdi.
