Túrkistanda 100-den astam muǵalimge tólengen qarjy bıýdjetke qaıtaryldy

TÚRKІSTAN. QazAqparat – Túrkistan oblysynda 100-den astam pedagogke tólengen qarjy bıýdjetke qaıtaryldy. Bul týraly Túrkistan oblysynyń Bilim salasyndaǵy sapany qamtamasyz etý departamenti basshysynyń mindetin ýaqytsha atqarýshy Janar Qasymova málimdedi, dep habarlaıdy QazAqparat tilshisi.

Bilim salasyndaǵy sapany qamtamasyz etý departamentiniń mamandary júrgizgen zerdeleý jumystarynyń barysynda birshama kemshilik anyqtalǵan.

Máselen, óńirde 322 pedagogti bilim berý uıymdaryna jumysqa qabyldaý kezinde konkýrs erejeleri saqtalmaǵan. Bul boıynsha Qazaqstan Respýblıkasy Bilim jáne ǵylym mınıstriniń 2012 jylǵy 21 aqpandaǵy №57 buıryǵynyń talaptaryn buzǵan 90 mektep dırektory tártiptik jaýapkershilikke tartyldy.

Sondaı-aq, jaratylystaný-matematıkalyq baǵyttaǵy pánderdi aǵylshyn tilinde ótkizý deńgeıiniń sáıkestigin anyqtaý maqsatynda 228 pedagogtiń sabaǵyna zerdeleý jumystary júrgizilgen. Nátıjesinde 123 pedagogtiń sabaq ótkizý deńgeıi talaptarǵa sáıkes kelmeýine baılanysty qosymsha tólem bıýdjetke qaıtarylǵan.

«Túrkistan oblysynda «Mektepke deıingi jáne orta bilim berý uıymdaryn beınebaqylaý júıelerimen jaraqtandyrý standarttary jáne olarǵa qoıylatyn talaptarǵa» sáıkes kelmeıtin 731 mektep bar. Sonymen qatar, óńirde 149 mekteptiń sport zaly joq. 16 mektepte ınternet jelisi jumys istemeıdi. 908 mekteptiń 800-ge jýyǵynda syrtqy dárethanalar jabylmaǵan. Ásirese, eldi mekenderde sýdyń ýaqytpen berilýi, elektr júıesiniń isten shyǵýy, ortalyqtandyrylǵan káriz júıelerine qosylmaýy sekildi máseleler bar», - dedi Janar Qasymova.