Túrkistanda 1 mln teńgesimen taksıde qalǵan sómke kóshedegi kameralar kómegimen tabyldy

NUR-SULTAN. QazAqparat – Túrkistanǵa jumystarymen baryp, taksıge otyrǵan Qyzylorda turǵyny sómkesin kólikte umytyp ketedi. Jergilikti polıtseıler beınebaqylaý jelisi arqyly joǵalǵan zatty 4 saǵattyń ishinde taýyp bergen, dep habarlaıdy QazAqparat Túrkistan oblystyq PD baspasóz qyzmetine silteme jasap.

«Men Túrkistan qalasyna jeke jumystarymmen baryp, qala ishinde belgisiz taksıge otyrdym, qajet jerime kelgen soń túsip qaldym. Arada birneshe mınýt ótkende kólik ishinde 1 mıllıon teńge aqshasy bar qol sómkemdi umytyp ketkenimdi baıqadym. Birden túsken jerime qaıta barǵanymmen, ol kólikti tappaı qaldym. Biletinim, tek qana kóliktiń túsi jáne markasy, al onyń memlekettik tirkeý nómiri nemese baılanys nómirinen múldem habarsyz edim. Sodan júgirip jaqyn mańdaǵy polıtsııa pýnktine bardym. Biraq, ishteı kúderimdi úzgen edim, tabylmaıdy-aý dep. Alaıda, polıtseılerdiń shuǵyl jumysy arqasynda 4 saǵat ishinde kólik te, sómkem men aqsham da tabyldy», -dep qyzylordalyq áıel polıtseılerge alǵys bildirdi.

Kólik jedel basqarý ortalyǵyndaǵy beınebaqylaý kameralary arqyly tabylǵan. Joǵalǵan sómke ishindegi barlyq aqshasymen ıesine qaıtarylǵan.