Túrkistan jurtshylyǵy zilzaladan zardap shekken túrkııalyqtarǵa kómek jınaýdy bastap ketti
Bul jumysqa aqsaqaldar alqasy men assambleıa músheleri, oqý oryndardyń ujymdary men stýdentteri de óz úlesin qosyp jatyr.
Biri bir kúndik jalaqysyn aýdarsa, endi biri qajetti kıim-keshek pen gıgıenalyq zattar jınap, arnaıy oryndarǵa ótkizip jatyr.
Búgin Túrkistan qalasynda Túrkııada bolǵan zilzalaǵa baılanysty oblystyq aqsaqaldar alqasy, QHA janyndaǵy aqsaqaldar keńesi, etnomádenı birlestikter men qalalyq ardagerler keńesi arnaıy úndeý jasady.
Atalǵan sharada Túrkistan qalasynyń bas ımamy Muhamedjan Ergeshbaıuly qurban bolǵan jandardyń rýhyna quran baǵyshtady.
Kezdesýde óńirdegi kásipkerler men barsha qaıyrymdy jandar baýyrlas túrik halqyna kómek qolyn sozatynyn aıtty.
«Apat aıtyp kelmeıdi» deıdi dana halqymyz. Túrkııada bolǵan jer silkinisi dúıim jurtty dúr silkindirdi, qaıǵyly oqıǵa barshamyzdyń qabyrǵamyzdy qaıystyrdy. Osyndaı qıyn kezeńde kómek berý - úlken baýyrmaldyqtyń belgisi. Sondyqtan da barsha kásipkerler men Túrkistan jurtyn baýyrlas elge qolymyzdan kelgenshe járdem berip, qoldaýǵa shaqyramyz», - dedi Túrkistan oblystyq aqsaqaldar alqasynyń tóraǵasy Jarylqasyn Áziretbergenov.
Q.A.ıAsaýı atyndaǵy halyqaralyq qazaq-túrik ýnıversıtetiniń rektor ókili, professor Peıamı Battal osyndaı qıyn kezde qoldaý bildirgen qazaq baýyrlaryna sheksiz rızashylyǵyn bildirdi.
Jıynda belgili bolǵandaı, oblys ortalyǵynda gýmanıtarlyq kómek berý boıynsha arnaıy komıssııa quryldy.
Bul oraıda túrkistandyqtar «Jeńis» saıabaǵynda ornalasqan qalalyq «Yntymaq úıinde» Túrkııadaǵy azamattarǵa arnalǵan kómekterin tapsyra alady.
Aıta keteıik, keshe túrkistandyqtar 2 ushaq gýmanıtarlyq kómek jiberetinin jazǵan bolatynbyz.
