Túrkistan jurtshylyǵy Joldaýdyń basym baǵyttaryn talqylady
Atalmysh is-sharany Eýrazııalyq ıntegratsııa ınstıtýty men Túrkistan oblysy ákimdiginiń qoǵamdyq damý basqarmasy birlesip uıymdastyrdy. Sharanyń maqsaty – QR Prezıdenti Joldaýda usynǵan basym mindetterdi talqylaý. Jıynǵa joǵary bilim júıesiniń, ardagerler keńesiniń ókilderi, jastar men kásipkerler qatysty.
Іs-sharanyń moderatory, belgili saıasattanýshy Erlan Saırov El Prezıdentiniń Joldaýy eldegi áleýmettik-saıası protsesterdiń negizgi elementi jáne qoǵamdyq bolmysty baıyppen jańartý kontýry ekenin atap ótti.
«Prezıdent Joldaýy elimizdegi áleýmettik-saıası protsesterdiń jáne qoǵamdyq sanany jańǵyrtýdyń bazalyq elementi bolyp tabylady. Memleket pen azamattar arasynda baılanystyń jańa formaty, turǵyndarmen keri baılanystyń jańa mehanızmderi qajet. Bul rette, jastar qaýymy eń belsendi ári negizgi kúsh ekeni daýsyz. Joldaýda áleýmettik máselelermen qatar, qoǵamdyq-saıası úrdisterdi jańǵyrtý, qoǵammen bılik arasynda dıalog ornatý máseleleri qamtylǵan. Ózgerissiz birde-bir qoǵam nemese memleket damı almaıdy. Sondyqtan qoǵamdaǵy jańa ózgeristerge, damý protsesterine daıyn bolýymyz kerek. Ol úshin ulttyń sanasyn kótere otyryp, jańa áleýmettik standardtardy jasaǵan abzal», - degen saıasattanýshy, jańa dáýiri bastalǵan Túrkistan oblysy men Túrkistan qalasynyń iri ortalyqqa aınalatynyna senim bildirdi.
Túrkistan qalalyq ardagerler keńesinińm tóraǵasy J. Qulbaıymbetov Prezıdent Q. Toqaevtyń Joldaýy saıası maýsymdy ashyp bergenin aıtty. Onyń aıtýynsha, qujatta qoǵamdaǵy eń mańyzdy ári ózekti máseleler túgel qamtylǵan.
Túrli sanattaǵy azamattardyń pikirlerinen Prezıdenttiń alǵashqy Joldaýy joǵary bilim júıesi ókilderiniń ǵana emes, jastar arasynda da zor qyzyǵýshylyq týdyrǵanyn ańǵaryldy. Sóz sóıleýshiler Joldaýǵa degen qyzyǵýshylyǵyn ondaǵy aıtylǵan strategııalyq, ekonomıkalyq, saıası damý vektorlarymen qatar, ortalyq pen óńirlerde jınalyp qalǵan kókeıtesti problemalarǵa erekshe kóńil bólinýimen túsindirdi.
«Túrkistan oblysynyń jastary Memleket basshysynyń Joldaýyndaǵy áleýmettik jáne saıası bastamalardy qyzyǵýshylyqpen qabyldady jáne osy baǵyttaǵy jumystardy júzege asyrýǵa atsalysady. Ony talqylap qana qoımaı, naqty iske kóshý kerek», – deıdi jıynǵa qatysýshylar.
Basqosýda demografııa, áleýmettik kómek, saıası lıberalızatsııa, adam kapıtalyn damytý, qazaq halqyn kásipkerlikke beıimdeý jáne ózge de máseleler sóz boldy.
Túrkistanda Qazaqstan Respýblıkasy Prezıdenti Joldaýynyń oryndalýyn qoǵamdyq baqylaýdyń tetikteri tıimdi damýda. Azamattar men óńirlik bılik organdarynyń birlesken bastamasy boıynsha azamattardyń shaǵymdary men ótinishterin qarastyratyn jáne jaýap beretin qurylym qurylǵan.
