Túrkistan: Jetisaıda zamanaýı dıagnostıkalyq ortalyq salynyp jatyr
TÚRKІSTAN. QazAqparat - Túrkistan oblysy Jetisaı aýdany, Jańaaýyl okrýgine qarasty Yntymaq aýylynda jeke kásipker Sardar Shavkeev eki qabatty dıagostıkalyq ortalyqtyń qurylysyn júrgizýde. Nysannyń qurylysy sáýir aıynda bastaldy, dep habarlady óńir ákimdiginen.
«Salyp jatqan nysanymyz dıagnostıkalyq ortalyq sanalady. Aldaǵy ýaqytta turǵyndarǵa konsýltatıvtik jáne emdeý-dıagnostıkalyq qyzmet kórsetý túrleriniń keń spektrin usynatyn bolamyz. Ortalyq zamanaýı, joǵary tehnologııalyq jabdyqtarmen qamtylady. Naýqastarǵa joǵary sanatty dárigerler keńes beredi. Buǵan deıin Shymkent, Túrkistan qalalaryna baryp, tekserilip júrgen aýdan turǵyndary endi bizdiń ortalyqtan tekseristen ótýine bar múmkindik jasalmaq», – deıdi Sardar Shavkeev.
Shavkeevter áýleti osydan úsh jyl buryn Jańaaýyl eldi mekeninen óz qarajattaryna 150 oryndyq zamanaýı balabaqsha ashqan bolatyn. Búginde aýyl turǵyndary balabaqshanyń ıgiligin kórip otyr. Qazirdiń ózinde munda 150 bala tárbıelenip jatsa, taǵy 60 bala kezekte tur. Osyny eskergen S. Shavkeev sáýir aıynda balabaqsha janynan 150 oryndyq mektepke deıingi daıarlyq ortalyǵynyń qurylysyn bastady. Qazirgi tańda ǵımarattyń ekinshi qabaty qalanýda. Atalǵan ǵımarat aldaǵy jeltoqsan aıynda aıaqtalady dep kútilýde.
