Túrkistan: Jetisaı men Báıdibek aýdandarynda kósheler jóndelýde

TÚRKІSTAN. QazAqparat – Túrkistan oblysynyń Jetisaı aýdanynda jol jóndeý jumystary qarqyn aldy. Búginde aýdan ortalyǵyndaǵy M.Áýezov kóshesinde atqarylyp jatqan jumystar aıaqtalýǵa jaqyn, dep habarlaıdy QazAqparat tilshisi.

Aýdandaǵy ózge de aýyl okrýgteri men «Shardara–Jetisaı» avtomobıl jolynyń birqatar bólikterindegi asfalt tóseý jumystary odan ári jalǵasýda. Olarǵa qajetti asfalt aýdannyń ózinde daıyndalady. Máselen, jaqynda Qazybek bı aýyldyq okrýginde saǵatyna 100 tonnaǵa jýyq asfalt shyǵaratyn zaýyt iske qosyldy. «Hansheber» JShS-de 30-ǵa jýyq adam jumyspen qamtylǵan. Óndiris ornyna qajetti negizgi shıkizat Shymkent qalasynan tasymaldanady. Kásiporynnyń bas mehanıgi Ermahan Áshirbaevtyń málimdeýinshe, óńirdegi jol jóndeý jumystaryna qajetti asfaltty Shymkentten ákelý tıimsiz. Sol sebepti atalǵan seriktestik qurylys nysandaryna jaqyn jerden asfalt zaýytyn salýdy qolǵa alýda.

Báıdibek aýdanyndaǵy Báıdibek ata aýylynda da kóshelerdi jóndeý jumystary qarqyndy túrde iske asyp jatyr.

Bul aýyldy kórkeıtý, kóriktendirý jumystaryn júzege asyrý máselesi jaqynda aýdandyq qoǵamdyq keńeste talqylanyp, aýdandyq máslıhat depýtattarynyń qoldaýymen qolǵa alynǵan. Oblystyq máslıhattyń sheshimimen aýdan bıýdjetine nysanaly transfertter esebinen Báıdibek ata aýylyndaǵy birqatar kósheler men abattandyrý jumystaryna qarjy bólindi.

Buǵan qosymsha jergilikti bıýdjet esebinen osy aýyldaǵy «Taǵzym» men balalar alleıasyn abattandyrýǵa, Qarabastaý men Balǵynsaı jáne E.Shókeev kóshelerin ortasha jóndeýge qajetti qarajat bólingen.