Túrkistan jastary «WorldSkills Kazakhstan - 2018» Ulttyq chempıonatynda top jardy
TÚRKІSTAN. QazAqparat - Túrkistan jastary «WorldSkills Kazakhstan - 2018» Ulttyq chempıonatynda top jardy, dep habarlaıdy QazAqparat oblys ákimdiginiń baspasóz qyzmetine silteme jasap.
WorldSkills - jumysshy mamandyǵynyń mártebesin arttyrý jáne dáripteý maqsatynda álemniń 82 memleketine taralǵan halyqaralyq qaýymdastyq. Onyń quramyna Qazaqstan 2014 jyly 70-shi qatysýshy memleket bolyp tirkelgen.
WorldSkills qozǵalysyn damytýdyń negizgi maqsaty - kásiptik bilim berýdegi tehnıkalyq, qyzmet kórsetý jáne qurylys salalary boıynsha qatysýshylardyń tájirıbelik daıyndyǵyn, kásiptik biliktiligin, shyǵarmashylyǵy men joǵary eńbek mádenıetin, zamanaýı, onyń ishinde aqparattyq-kommýnıkatsııalyq tehnologııalardy is júzinde qoldana alý biliktiligin synaý.
Astana qalasynda ótken «WorldSkills Kazakhstan - 2018» Ulttyq chempıonatyna Túrkistan oblysynan 9 stýdent qatysyp, onyń altaýy júldeli oryndarǵa ıe boldy. Ulttyq chempıonattyń jabylý saltanatyna QR Premer-Mınıstri Baqytjan Saǵyntaev arnaıy qatysyp, kolledj stýdentteri men bilikti jas mamandardy marapattady.
Atap aıtqanda, Kentaý kópsalaly kolledjiniń stýdenti Maqsat Iskandarov «Santehnıka jáne jylytý» sanaty boıynsha, Shymkent agrarlyq kolledjiniń stýdenti Nurbah Shynybek «Aýyl sharýashylyǵy mashınalary men traktorlardyń slesar-jóndeýshisi» boıynsha altyn medalǵa qol jetkizdi. Sondaı-aq, Shardara qalasyndaǵy №16 kolledj stýdentteri Dáýlet Tólebaev «Plıtkamen qaptaý» boıynsha, Janarys Taýbaı «Qurǵaq qurylys» boıynsha, al Kentaý polıtehnıkalyq kolledjiniń stýdenti Ómirbek Halımov «Elektronıka» sanatynda kúmis medaldarǵa ıe boldy. Sonymen birge, «Shashtaraz óneri» boıynsha Mıras kolledjiniń túlegi Oljas Artyqbaı qola medaldy ıemdendi.
