Túrkistan jastary «Ózin-ózi basqarý» uıymynyń alǵashqy otyrysyn ótkizdi

TÚRKІSTAN.QazAqparat – Túrkistan oblysynda «Jastar resýrstyq ortalyǵynyń» janynan ashylǵan «Ózin-ózi basqarý» uıymynyń alǵashqy otyrysy ótti. Jıynda ortalyq basshysynyń mindetin atqarýshy Amalbek Ómirtaı basqosýdyń mańyzy men maqsatyn túsindirdi, dep habarlaıdy QazAqparat tilshisi.

«Ózin-ózi basqarý uıymy jastarǵa ózin-ózi jáne ujymdy basqarýdy úıretetin, azamattyq-quqyqtyq minez-qulyqtyń áleýmettik tájirıbesin jınaqtaýǵa múmkindik beretin mektep. Tehnıkalyq jáne kásiptik bilim berý uıymdary ómirdiń mańyzdy suraqtaryna jaýap izdeıtin, oı órisi keń, tulǵalyq qalyptasýǵa múmkindik týǵyzatyn orta. Basty maqsat – jastardy úzdiksiz damýǵa, qoǵamdyq ómirge beıimdeý jáne júıeli shyǵarmashylyq jumystardy uıymdastyrý arqyly oı jıegin keńeıtip, jaýapkershilikke daǵdylandyrý», – dedi A.Ómirtaı.

Basqosýda «Ózin-ózi basqarý» uıymynyń jetekshisi Áneli Meıirbek jumys josparymen tanystyrdy.

«Ózin-ózi basqarý» uıymynyń qurylymynda basqarýshy organ bolady. Prezıdenti bilim berý uıymdarynyń daýys berý nátıjesimen saılanady. Al, baǵytyna kelsek, «Jasampazdyq», «Básekege qabilettilik», «Yntymaqtastyq», «Ádilettilik», «Qamqorlyq» ustanymdary boıynsha jumys jasaıdy. Túrkistan oblysy boıynsha biryńǵaı úlgide jospary, tósbelgisi, logotıpi, urany jáne áleýmettik jelilerde paraqshalary bolady»,- dedi Áneli Meıirbek.

Jıynda sondaı-aq, jaryssózge shyqqan sala mamandary men jastar ózara pikir almasyp, usynystaryn aıtty.