«Túrkistan jastary» baıqaýynyń jeńimpazdary marapattaldy
TÚRKІSTAN. QazAqparat - Túrkistan oblysynda memlekettik jastar saıasatyn júzege asyrýǵa jáne keńinen nasıhattap, oblys kóleminde damýyna úles qosqandar marapattaldy. «Túrkistan jastary» baıqaýynyń jeńimpazdaryn oblys ákiminiń orynbasary Málik Otarbaev quttyqtady, dep habarlaıdy QazAqparat tilshisi.
Túrli salada óziniń bilimimen, talantymen, belsendiligimen top jarǵan jastardy anyqtaý jáne marapattaý maqsatynda dástúrli túrde jastar premııasy baıqaýy uıymdastyryldy. Bıylǵy baıqaý Táýelsizdigimizdiń 27 jyldyǵyna oraı 27 nomınatsııa boıynsha ótti. Jeńimpazdardy anyqtaý oblys aýmaǵyndaǵy qala-aýdandarda da júrgizilip, komıssııa sheshimimen irikteldi. Áleýmettik jelilerde daýys berý qorytyndysy da nazarǵa alynǵan bolatyn.
Qatysýshylar ózderiniń úzdik atanýǵa laıyq ekenin kórsetetin qujattar men jumystaryn ótkizip, áleýmettik jeliler men aqparattyq portaldarda «Túrkistan jastary» taqyrybynda pikirler men maqalalar jazdy. Beınetúsirilimderin usyndy.
Baıqaýǵa jalpy sany 145 jastan ótinim túsip, komıssııa 27 úzdik jasty anyqtady. Taǵy úsh úmitker uıymdastyrýshylar tarapynan arnaıy júldemen marapattaldy.
Jeńimpazdar oblys ákimi Janseıit Túımebaevtyń arnaıy alǵys hatymen jáne 100 000 teńge qarjylaı syılyqpen marapattaldy. Al «Úzdik jastar resýrstyq ortalyǵy» nomınatsııasynyń jeńimpazdary arnaıy jolaýshylar kóligine ıe boldy.
