Túrkistan, Jambyl, Almaty, Aqtóbe jáne Shyǵys Qazaqstan oblystarynda ózendegi sý kóteriledi
NUR-SULTAN. QazAqparat - Ótken aptada «Qazgıdromet» RMK jerdi qashyqtyqtan zondtaý jáne NASA spýtnıkteriniń óńdelgen sýretteri boıynsha Qazaqstan aýmaǵynyń qar alańy 15%-ǵa qysqarǵanyn anyqtady, dep habarlaıdy QazAqparat.
Sondaı-aq, ótken aptada Aqmola, Qostanaı jáne Soltústik Qazaqstan oblystarynyń ózen basseınderinde topyraqtyń qatý tereńdigi 12-60 sm-ge azaıǵan. Qaraǵandy oblysynyń ózen basseınderinde topyraq tolyǵymen erigen.
«Aldaǵy aptada Qazaqstan aýmaǵynyń basym bóligine atlantıkalyq jáne ońtústik tsıklondar áser etedi. Osyǵan baılanysty jaýyn-shashyn, kóbine jańbyr jaýady. Elimizdiń ońtústigi men ońtústik-shyǵysyndaǵy taýly aýdandarda arty qarǵa ulasatyn qatty jańbyr jaýady. Osyǵan baılanysty taý bókterindegi aýdandarda erigen qar sýynyń qalyptasýy jáne Túrkistan, Jambyl, Almaty jáne Shyǵys Qazaqstan oblystarynyń taýly ózenderinde sý deńgeıi kóteriledi» delingen habarlamada
Aqtóbe oblysynyń soltústik bóliginde ózenderdiń muzdan tazartýy jáne sý deńgeıiniń kóterilýi kútiledi.
Sondaı-aq, ózenderde qar jamylǵysynyń erýine baılanysty sý deńgeıiniń artýy Shyǵys Qazaqstan oblysynda da boljanyp otyr.
