Túrkistan túrki halyqtarynyń qara shańyraǵyna aınalady - Dıhan Qamzabekuly

ASTANA. QazAqparat - Túrkistan oblys ortalyǵy retinde túrki halyqtarynyń qara shańyraǵyna aınalady. Mundaı pikirdi L.Gýmılev atyndaǵy Eýrazııa ulttyq ýnıversıtetiniń prorektory, alashtanýshy ǵalym Dıhan Qamzabekuly bildirdi, dep habarlaıdy QazAqparat tilshisi.

«Bul ýaqyty jetken jáne Táýelsizdik talaptaryna jaýap beretin sheshim. Óıtkeni, oılap qaraǵan kezde Qazaqstannyń búgingi aýmaqtyq bólinisi báribir de keńestik bóliske sáıkes keledi. Belgili bir dárejede onyń saıası da negizderi boldy. Bizdegi qazirgi bólinisterdiń barlyǵy tarıhı negizde bolýy kerek. Mysaly Ortalyq Qazaqstan - Ulytaý, Batys Qazaqstan - Saraıshyq, Shyǵys Qazaqstan - Altaı oblysy bolýy kerek. Munyń barlyǵy tarıhpen baılanysty. Kezinde túrli formatta osyndaı usynys berilgen de edi. Al zııalylarda Ońtústik Qazaqstan oblysy ne Qazyǵurt ne Túrkistan oblysy bolýy kerek degen oılar bolǵan. Elbasy munyń barlyǵyn saralaı, salmaqtaı kele oń sheshim qabyldap otyr»,- dedi ǵalym.

Osy rette Dıhan Qamzabekuly Túrkistannyń oblys ortalyǵy bolýynyń qandaı mańyzdy tustary bar ekendigine de toqtaldy.

«Birinshiden, Alash zııalylary aıtqan qarashańyraqtyń bizde qalǵanyn kórsetip otyramyz. Sonymen qatar bul tarıhı mindet júkteıdi, jaýapkershiligimiz artady. Rýhanı jańǵyrýy arqyly sanamyzda da serpilis bolady. Ekinshiden, Túrkistannyń tutastyǵyna baǵyttalǵan jańa ǵylymı jobalar kerek. Sol arqyly Ortalyq Azııa eshqashan bólinbeıdi, aǵaıynbyz degen dúnıeni ustanamyz. Túrkistannyń oblys ortalyǵyna aınalýy Ortalyq Azııanyń eshqashan dúrdarazdyqqa barmaıtyndyǵyna, bólinbeıtindigine naǵyz qazyq bolady. Jalpy, Túrkistannyń jańǵyrýy, Túrkistan ıdeıasynyń kóterilýi túrki dúnıesine de jaqsy áserin tıgizedi. Túrkistan oblysynyń paıda bolýy tarıhshylarǵa, jalpy qoǵam tanýshylarǵa jańa mindet júkteıdi», - dedi Dıhan Qamzabekuly.