Túrkistan túrki áleminiń mádenı-rýhanı ortalyǵyna aınalady
Memleket basshysy Nursultan Nazarbaevtyń Túrki keńesiniń VI sammıtinde kótergen «Túrki dúnıesiniń tuǵyrly tulǵalary» jáne «Túrki áleminiń kıeli jerleri» bastamalaryn júzege asyrý baǵytynda uıymdastyrylǵan ǵylymı basqosýda túrki dúnıesiniń ǵylymy, mádenıeti men ádebıeti, túrki tilderi, kıeli jerler men tuǵyrly tulǵalary týraly aıtyldy.
«Túrki áleminiń kıeli jerleri» dep atalatyn sektsııasynda Túrki dúnıesiniń kıeli jerlerin anyqtaý jobasyn ázirleý men onyń krıterılerin belgileý jaıy sóz boldy. Atalǵan jobany iske asyrý merizimi men kezeńderi, júzege asyrý tártibi jáne ózge de máseleler talqylandy. Al, «Túrki dúnıesiniń ataqty tulǵalary» sektsııasynda tulǵalardy anyqtaý krıterıleri men osy jobany júzege asyrýdyń tetikteri talqylandy. Sondaı-aq, «Túrki tilderi men jazýy» taqyrybyndaǵy úshinshi sektsııada túrki tili, túrki ádebıeti, túrki tildes elderdiń latyn grafıkasyna kóshýi týraly máseleler kóterildi. Konferentsııaǵa qatysýshylar Túrkistannyń Túrki áleminiń rýhanı ortalyǵyna aınalýǵa tolyq múmkindigi bar ekenine toqtalyp, osy baǵyttaǵy jumystarǵa úles qosýǵa daıny ekenderin jetkizdi.
Túrkistan tórinde ótken konferentsııada Halıl Akyndjy (Túrkııa), Vıktor Býtanaev (Reseı), Mekemtas Myrzahmetov (Qazaqstan), Kıýrshad Zorlý (Túrkııa), Qanybek Imanalıev (Qyrǵyz Respýblıkasy), Ramız Askerov (Ázerbaıjan), Ómirzaq Aıtbaev (Qazaqstan), Bahtıer Karımov (Ózbekstan), Rahmoıl Safarov (Tájikstan), Aleksandr Vasılev (Reseı) jáne taǵy basqa tarıhshylar men ǵalymdar, professorlar men týrkologtar bilgenderin ortaǵa saldy.
Aıta keteıik, búgin Túrkistan qalasynda «Kıeli Túrkistan jáne Túrki dúnıesiniń rýhanı jańǵyrýy» atty ǵylymı-teorııalyq konferentsııa ótýde. «Rýhanı jańǵyrý» baǵdarlamasy aıasyndaǵy mańyzdy jıyndy Túrkistan oblysynyń ákimdigi men Halyqaralyq Túrki Akademııasy uıymdastyryp otyr. Jıynǵa elimizden bólek Ázerbaıjan, Reseı, Túrkııa, Qyrǵyz Respýblıkasy, Ózbekstan, AQSh, Tájikstan, Úndistan memleketterinen týrkologtar men ǵalymdar jáne dıplomatııalyq ókildikterden de qonaqtar qatysýda. Konferentsııany Halyqaralyq Túrki Akademııasynyń prezıdenti Darhan Qydyráli júrgizip otyr.
