Túrkistan turǵyny «koronavırýs juqtyrǵan áıel aramyzda júr» dep jalǵan aqparat taratqan
TÚRKІSTAN. QazAqparat – Túrkistan oblysynda Saryaǵash aýdanynyń turǵyny «koronavırýs juqtyrǵan áıel aramyzda júr» dep áleýmettik jelilerde jalǵan aqparat taratqan. Óz kezeginde jábirlenýshi polıtsııaǵa jalǵan aqparat taratýshylardy jaýapkershilikke tartý týraly ótinish bildirgen, dep habarlaıdy QazAqparat tilshisi.
Atalǵan jaıt boıynsha polıtseıler QR QK-niń 274-baby 2-bóligi «kórineý jalǵan aqparat taratý» boıynsha SDTBT-ǵa tirkep, shuǵyl izdestirý jumystaryn júrgizdi. Keles APB-nyń polıtsııa qyzmetkerleri 18 naýryz kúni jalǵan aqparat taratýshyny anyqtap, ustaǵan. Kúdikti óz áreketin tolyq moıyndap, jasaǵanyna ókingenin jetkizgen. Qazirgi ýaqytta atalǵan jaıt boıynsha sotqa deıingi tergeý amaldary júrgizilip, tıisti saraptamalar taǵaıyndaldy. Kúdikti qolhatpen bosatylǵan.
Al, jelide taralǵan aýdıohabarlamadaǵy áıeldiń 10.03.2020 j Máskeý-Shymkent reısimen Germanııadan ushyp kelgeni belgili bolǵan. Áýejaıda ony medıtsına qyzmetkerleri qarsy alyp, Shymkent qalasyndaǵy páterine úı jaǵdaıyndaǵy karantınge jatqyzǵan. Qazirgi ýaqytta ol ambýlatorııalyq em qabyldaýda. Onyń densaýlyǵyna tónip turǵan qaýip joq ekeni anyqtaldy.
