Túrkistan turǵyny 15 mln turatyn asyl tuqymdy qoshqar sanyn kóbeıtpek
Báıdibek aýdany Shaıan aýylynda turatyn sharýa Amannýlla Aıtahanov asyl tuqymdy «gıssar» qoıyn ósirýmen aınalysady. Qylshyq júndi, quıryqty qoılardyń eti maıly ári dámdi keledi. Baǵasy da qazaqy qoıdan qymbat. Máselen, salmaǵy 180-190 keli tartatyn qoshqardyń quny 10-15 mln teńgege deıin barady.
«Ótken jyly saryaǵashtyq Qýanysh Myqtybaev esimdi azamat «kashtan» qoshqaryn 40 myń dollarǵa satyp aldy. Boıy bir metrden asatyn qoshqardyń salmaǵy 176 keli boldy. «Kashtannyń» qozysy kemi 1 mln teńgeden joǵary baǵalanady», - deıdi sharýa.
Qazir Amanýlla Qurmanjanulynyń qorasynda sol «kashtan» tuqymdy qoshqardyń qozysy ósip jatyr. Oǵan da qyzyǵýshylyq tanytyp, satýǵa qolqa salǵandar bolypty. Tipti, qomaqty qarjy da usynǵan.
«15 mln teńgege bermedim. Sebebi, ózime qajet. Qoılarǵa qosyp, tuqymyn alyp, kóbeıtemin», - deıdi ol.
Jalpy, Aıtahanovtar otbasy burynnan mal sharýashylyǵymen aınalysady. Keńes úkimeti kezinde ákesi Qurmanjan kolhozdyń qoıyn baqqan. Al, el táýelsizdigin alǵan soń, jeke sharýashylyq bolyp bólingen. Qazirgi kezde sharýashylyqta 1 500-ge jýyq asyl tuqymdy «gıssar» qoıy bar. Odan bólek, 150-deı jylqy men 40-qa jýyq sıyr ósirip otyr.
«Memleketten eshqandaı sýbsıdııa alǵan emespin. Barshasy ózimizdiń qol eńbegimizben jasap jatqan dúnıemiz. Buryn bizde tek «merınos» qoıy bolatyn. Keıin Saıramnan 1 mln teńgege «kashtannyń» qozysyn alyp keldim. Sondaı-aq, araǵa 2-3 jyl salyp, 200 «gıssar» tuqymdy qoıdy qostym. Sodan barlyq qoıdy asyl tuqymdy ettik», - deıdi sharýa.
Amannýlla Aıtahanov kóbinese qoılaryna ózi qaraıdy. Balasy kómekshi. Odan bólek, taǵy eki jumysshysy bar. Mal qyrkúıekke deıin jaıylymda júredi. Al, kún sýyta bastaǵan sátte qorada ustaıdy.
«Qazaqy qoılardy bordaqylaý úshin arnaıy baılaımyz ǵoı. Al, «gıssar» qoılary etti júrip jınaıdy. Onyń etin jegen adam, túnde ústine kórpe jamylmaı jatady», - deıdi sharýa.
Aıta ketsek, qazir Shaıan aýylynda «gıssar» qoılaryn ósirýshiler kóbeıip keledi. Olardyń barshasy da Amanýlla Aıtahanovtan «kashtannyń» tuqymyn alyp, keńesine júginip otyrady.
