Túrkistan: Túlkibasta 50 gektardan astam jerge shıe kósheti otyrǵyzylady
TÚLKІBAS. QazAqparat - Túrkistan oblysy Túlkibas aýdanynda 54 gektar aýmaqqa shıeniń (chıreshnıa) erte pisetin suryby otyrǵyzylyp jatyr, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Onyń 50 gektary Mıchýrın aýyldyq okrýginde ornalasqan «Móldir» JShS-ne tıesili. Seriktestik dırektory Q.Úsembaev kóshetti ázirge 30 gektarǵa egip, qalǵan 20 gektaryn kúz aılarynda egýdi josparlap otyr.
«Biz kóshetti arnaıy Túrkııadan aldyrtyp otyrmyz. «Amerıkanka» dep atalatyn shıeniń bul túrin erte ónim beretindikten jáne óte joǵary suranysqa ıe bolǵandyqtan tańdap aldyq. Qazirgi tańda, arnaıy mamandardyń kómegimen kóshetterdi talapqa saı etip otyrǵyzyp jatyrmyz», – dedi mekeme basshysy.
Sondaı-aq, 4 gektar aýmaqqa shıeniń tap osy túrin egýdi Aqbıik aýyldyq okrýgindegi «Nursáýle Frýts» JShS de qolǵa alǵan. Sondaı-aq, atalǵan seriktestik erte kóktemde 50 gektar alqapqa «Gala», «Golden Delıshes», «Starkrımson» sortty alma kóshetterin de otyrǵyzǵan. Mekeme basshysy ónimge degen suranys arta tússe baýdyń kólemin de keńeıtýdi kózdep otyr. Eki sharýa qojalyq ta baýdan mol ónim alý úshin ızraıldik tehnologııany qoldanýda.
Aýdan ákimi Nurlan Baıǵut shıe baýyn baptap otyrǵan seriktestikterde arnaıy bolyp, ondaǵy atqarylyp jatqan jumystarmen tanysty. Kásipkerlerdiń bastamalaryna sáttilik tilep, ákimshilik tarapynan tıisti qoldaý bolatynyn aıtty.
Aıta keteıik, qazirgi tańda jalpy aýdanda erte pisetin shıeniń sorty 33 gektar jerge otyrǵyzylǵan. Joǵaryda atalǵan seriktestikterdiń jospary júzege assa baýdyń kólemi 87 gektarǵa deıin ulǵaımaq.
