Túrkistan: Túlkibasqa keletin týrıster sany artty
TÚRKІSTAN. QazAqparat - Túrkistan oblysynyń Túlkibas aýdanyna jyl basynan beri 6 myńnan astam týrıst kelgen. Sonyń ishinde 473-i – shetel azamattary. Bul kórsetkishter byltyrǵy jyldyń tıisti kezeńimen salystyrǵanda 1040 týrıstke nemese 14 paıyzǵa artyp otyr, dep habarlaıdy QazAqparat.
«Barshamyzǵa belgili ornalastyrý oryndary bolmasa týrızm de bolmaıdy. Aýdan aýmaǵynda 2 qonaqúı: «Karıma» jáne «Erejep Ata», 2 emdik-saýyqtyrý orny: «Aqsý-Jabaǵyly ońaltý-saýyqtyrý kesheni» jáne «Aq-bulaq balalar ókpe qurt emdik shıpajaıy», 7 balalar saýyqtyrý lageri: «Mashat-Arasan», «Tań nury», «Mashat Erke», «Arman», «B.Sattarhanov», «Otyrar», «Orbıta» jáne 18 demalys aımaǵy demalýshy qonaqtarǵa qyzmet kórsetedi. «Batys Eýropa – Batys Qytaı» avtodáliziniń Túlkibas aýdany aýmaǵynda da jol boıy qyzmet kórsetý ortalyqtary ashylyp, jumys isteýde», - dep málim etti oblys ákimdiginen.
Sonymen qatar Gúlder, Vodnık balalar lagerlerin de qaıta qurylymdaý, qalpyna keltirý jumystary júrgizilýde.
Aýdan aýmaǵynda týrızm salasyn damytýǵa baǵyttalǵan birqatar ınvestıtsııalyq jobany bıyl iske qosý josparlanyp otyr.
