Túrkistan tórinde Qazybek bıge eńseli eskertkish ashyldy
TÚRKІSTAN. QazAqparat - Táýelsizdigimizdiń 30 jyldyq merekesine oraı Túrkistan qalasynda qazaqtyń birtýar qaıratkeri, tarıhı tulǵa – Qazybek bı Keldibekulynyń eskertkishi ornatyldy. Tas músin «Qaz daýysty Qazybek bı» qorynyń demeýshiligimen jáne Túrkistan qalasy ákimdiginiń qoldaýymen eńse tiktedi, dep habarlaıdy QazAqparat tilshisi.
Eńseli eskertkishtiń jalpy bıiktigi – 8 metr, mystan quıylǵan. Avtory – tanymal músinshi, Eýrazııalyq dızaınerler odaǵynyń múshesi Bekseıit Kúzembekov.
Túrkistandaǵy Qazybek bı kóshesindegi «Qazybek bı» alleıasynan boı kótergen eskertkishtiń ashylý saltanatyna elimizdiń túkpir-túkpirinen zııaly qaýym ókilderi, tarıhshylar jáne bıdiń urpaqtary keldi. Saltanatty is-sharada Túrkistan oblysy ákiminiń orynbasary Sáken Qalqamanov Qazaq handyǵynyń nyǵaıýyna eleýli úles qosqan Qazybek bıdiń tarıhtaǵy orny erekshe ekenin atap ótti.
«Biz búgin qos birdeı aıtýly kúnniń qurmetine bas qosyp otyrmyz. Onyń alǵashqysy – Táýelsizdiktiń 30 jyldyq merekesi. Búgingideı keregemiz keń, bosaǵamyz bútin zamanda kún keshýimiz – Táýelsizdik syılaǵan tynyshtyq pen turaqtylyqtyń arqasy. Elbasy Nursultan Nazarbaevtyń óńirimizdi Túrkistan oblysy dep atap, onyń ortalyǵy retinde tarıhı Túrkistandy belgileýi – Táýelsizdiktiń jarqyn jeńisi dep bilemin. Sonymen qatar rýhanı shahar tórinde Qazybek bı babaamyzdyń eńseli eskertkishi boı kóterýde. Uly tulǵa beınesiniń Túrki jurtynyń mádenı-rýhanı ortalyǵynda boı kóterýi – zańdylyq. Onyń alǵashqy sebebi – Qazybek bı Keldibekulynyń Qoja Ahmet ıAsaýı kesenesinde jerlenýi. Qazaq rýhanııatynyń jandanýyna ólsheýsiz úles qosqan Qazybek bı beınesi óskeleń urpaqty izgilikke baǵyttaıtyn baǵdary bolady dep senemin», – dedi Sáken Qalqamanov.
Saltanatty jıynda Qazaq eliniń tuńǵysh ǵaryshkeri, «Halyq qaharmany» Toqtar Áýbákirov, QR Ulttyq ǵylym akademııasynyń akademıgi Ǵalymqaıyr Mutanov jáne Túrkistan oblystyq Aqsaqaldar alqasynyń tóraǵasy Jarylqasyn Áziretbergen quttyqtaý sóz sóılep, qazaqtyń ardaqty bıi týraly oı qozǵap, Túrkistan tórindegi ıgi isti joǵary baǵalady. Igi is-sharadan keıin dańqty baba rýhyna arnalyp as berildi.
Sonymen birge osy kúni Qoja Ahmet ıAsaýı atyndaǵy HQTÝ-dyń májilis zalynda «Qaz daýysty Qazybek bı: tulǵa jáne tarıh» atty ǵylymı konferentsııa uıymdastyryldy. Jıynda Túrkistan oblystyq qoǵamdyq damý basqarmasynyń basshysy Ańsar Óserbaev qatysýshylardy Táýelsizdiktiń 30 jyldyǵymen quttyqtap, oblys ákimi Ómirzaq Shókeevtiń quttyqtaý hatyn oqyp berdi. Eskertkishti salýǵa úles qosqan «Qaz daýysty Qazybek bı» qorynyń ókilderine estelik syılyq pen alǵys hattardy tapsyrdy. Sonymen birge konferentsııa barysynda elimizge tanymal professorlar men ǵalymdar Qazybek bı Keldibekulynyń tarıhtaǵy orny, onyń memleketti qalyptastyrýdaǵy eńbegi, tulǵa men Túrkistan arasyndaǵy baılanys týraly qundy derekterdi qamtyp, baıandama jasady. «Qaz daýysty Qazybek bı» qoǵamdyq qorynyń tóraǵasy Pernebaı Dosymbek Túrkistan tórindegi oń ózgeristerge, tulǵalardy qurmetteý baǵytyndaǵy bastamalarǵa rızashylyqtaryn bildirdi.
