Túrkistan teatrynda jańa premera: Eýropadan 400 jyldyq mýzykalyq aspap arnaıy jetkizildi
NUR-SULTAN. QazAqparat – 17-18 jeltoqsan kúnderi Túrkistan mýzykalyq drama teatrynda «Mahabbat munarasy» jańa qoıylymy tanystyrylady, dep habarlaıdy QazAqparat.
Túrkistan mýzykalyq drama teatrynyń jańa premerasy qysqa ómirinde artyna mol mura qaldyrǵan Talaptan Ahmetjanovtyń «Sulý men sýretshi» shyǵarmasynyń jelisimen sahnalanbaq.
«Bul tek qana ǵashyqtarǵa kórinetin «Mahabbat munarasyna» jeteleıtin, minsiz sulýlyqtan týǵan shyǵarma. Munda mahabbat pen ónerdiń serenadasy saltanat qurady. Sulýlyq ataýyn tap-taza, móp-móldir ónerdiń ózeginen izdep, ómir boıy mahabbatyna adal bolǵan jannyń sezimine elitip, qudiretine ıip otyryp kóretin qoıylym. Premera «Alash» ádebı syılyǵy men Valentın Pıkýl atyndaǵy jáne Oralhan Bókeı atyndaǵy syılyqtardyń laýreaty, jazýshy-dramatýrg Talaptan Ahmetjannyń 60 jasqa tolýy premeramen tuspa-tus kelip otyr», - dep habarlady teatrdyń baspasóz qyzmeti.
T. Ahmetjanovtyń bul shyǵarmasy osyǵan deıin birneshe sahnada qoıylǵan, al Túrkistan mýzykalyq drama teatrynda ol zamanaýı kelbetke ıe bolmaq. Basty rólderdi Aqbota Rahat pen Juldyz Ábdikárimova, Ádil Ahmetov, Nurqanat Jaqypbaev jáne Túrkistan teatrynyń akterleri oınaıdy.
Qoıylymnyń rejısseri – Qazaqstannyń eńbek sińirgen qaıratkeri Nurqanat Jaqypbaı. Ol osymen úshinshi teatr sahnasynda «Sulý men sýretshini» sahnalaıdy. Úsheýi úsh túrli qoıylýymen erekshelenedi. Kórkemdik jetekshisi – Aınur Kópbasarova. Qoıýshy sýretshisi – Qabyl Halyqov. Spektaklge arnaıy mýzyka jazǵan Túrkistan mýzykalyq drama teatry mýzykalyq bóliminiń meńgerýshisi, bas kompozıtory Hamıt Shanǵalıev. Baletmeıster – Madına Muratpekova.
«Bul spektakldiń basty jańalyǵy premerada álemge áıgili Amatı (Antonius Hieronymus Amati) tarıhı aspabymen Shveıtsarııanyń Tsıýrıh qalasynda turatyn talantty mýzykant Eldar Saparaevtyń kelýi. Sahnada 1628 jyly jasalǵan 400 jyldyq tarıhy bar vıolonchelde qoıylymnyń mýzykasy oınalady. 300 jyl Eýropanyń koroldik otbasylarynyń jeke kollektsııasynda saqtalǵan Amati aspaby qazir murajaıǵa qoıylǵan. Álemde mundaı aspaptyń úsheýi ǵana saqtalǵan. Túrkistannyń tórinde oınalatyn Amatı tarıhı vıoloncheli – álemniń mádenı murasy», - deıdi Túrkistan mýzykalyq drama teatry.
Sonymen birge, Táýelsizdiktiń 30 jyldyǵy qarsańynda Túrkistan mýzykalyq drama teatry «Mahabbat munarasynan» bólek, Dýlat Isabekovtyń «Bórtesi» men Roza Muqanova jazǵan «Farızany» kórermen nazaryna usynady.
