Túrkistan teatryna Raıymbek Seıtmetovtyń esimi berildi
ShYMKENT. QazAqparat - Túrkistan qalasynyń sazdy-drama teatryna QR halyq ártisi, professor Raıymbek Seıtmetovtiń esimi berildi. Bul týraly oblystyq mádenıet basqarmasynyń basshysy málimdedi. Nurbolat Ahmetjanovtyń sózinshe, QR Úkimeti osy másele jóninde arnaıy qaýly shyǵarǵan, dep habarlaıdy QazAqparat HAA tilshisi.
«Túrkistan Túrki áleminiń mádenı astanasy atanǵan jyly Raıymbek Seıtmetovtyń ózi qurǵan óner oshaǵyna onyń esimin berý - Uly Dala eliniń ulylaryn ulyqtaý bolyp tabylady»,-dedi Ahmetjanov.
Aıta keteıik, kezinde Qoja Ahmet ıAsaýı atyndaǵy Halyqaralyq Qazaq-Túrik ýnıversıtetiniń rektory Murat Jurynovtyń qoldaýymen atalǵan oqý ornynan «Óner» bólimi ashyldy. Sol bólimge Almatydan teatr tarlany Raıymbek Seıtmetov kelip, talaı jasty ónerge baýlydy.
«Túrkistannyń rýhyn kóterý úshin eń áýeli sol jerdiń rýhanı ıgilikterin jasaýymyz qajet. Elimiz egemendik aldy, Túrkistan qaıta túleıtin bolady dep jastaıymnan baýyr basyp qalǵan Almatyny, ataq-abyroıyna ıe bolǵan óner ordasyn tastap, týǵan jerge tartyp ketýimniń basty sebebi de sol bolatyn. Túrkistan qaıta túlep, irgesin keńitip jatqanda sonyń bir shegesi bolyp qalǵym keldi...» dep Almatyny ne úshin tastap kelgenin túsindirgen edi sahna sańlaǵy.
Ózi tárbıelep, baýlyǵan shákirtterinen teatr trýppasyn jasaqtady. Elbasyna hat jazyp, qanshama mekemeniń tabaldyryǵyn tozdyryp júrip Túrkistandaı kıeli shaharda teatr qurdy. Ózi qurǵan teatrdyń irgetasyn qalap, qaıtalanbas qoıylymdar qoıdy.
