Túrkistan taýlarynda joǵalǵan stýdentterdi izdeý jumysy qalaı júrip jatyr
TÚRKІSTAN. QazAqparat - Túrkistan oblysynyń polıtseıleri taýda joǵalyp ketken stýdentterdi izdeý jumysy qalaı júrip jatqanyn aıtyp berdi, dep habarlaıdy QazAqparat.
Túrkistan oblysy polıtsııa departamenti bastyǵynyń orynbasary, polıtsııa podpolkovnıgi Qurmanbek Sahovtyń aıtýynsha, 60 polıtseı TJ qyzmetkerlerimen, shekarashylarmen jáne eriktilermen birlesip, izdeý jumysyna jumyldyrylǵan.
Bular - negizinen taýly jerlerde baǵdarlaýdy bes saýsaǵyndaı biletin jáne belgili bir tájirıbesi bar jedel bólimshe qyzmetkerleri men ýchaskelik ınspektorlar.
«Bizdiń izdeýimiz aýa-raıy qubylǵan jaǵdaıda da qıyn. Onda jaýyn bolsa, tuman bolsa qar jaýady. Jyldyń barlyq mezgili bir ýaqytta. Tek úshinshi kúni ǵana tikushaqty paıdalaný múmkindigi paıda boldy. Іzdeý jumysyn bastaǵanda taýdyń etegi jasyl ári kún ystyq boldy. Sodan keıin biz atpen júre bastadyq. Bir ýaqytta ystyq salqynmen almasyp, sodan keıin kún múldem sýyp ketti. Jylqylardy tastap, ári qaraı jaıaý júrýge týra keldi. Ulttyq parktiń barlyq aýmaǵy taýly, qyrly. Kóp shatqaldar men aǵysy qatty sýyq ózender. Kesh túsip, tún bastalǵannan soń tańerteń izdeýdi qaıta jalǵastyrý úshin taýda túnedik. Óıtkeni ár mınýt qymbat bolatyn» deıdi polıtsııa podpolkovnıgi.
Qurmanbek Sahovtyń sózine sensek, búgin joǵalǵan jastardyń úsheýi tabyldy. Olardy tikushaqpen alyp ketken.
«Al biz odan ári qaraı 4 jigitti izdeýge qaıtadan kirisip kettik. Bul oqıǵanyń sońy sátti aıaqtalady dep senemin. Alladan barlyq joǵalǵan jastardyń túgel tabylyp, óz otbasylaryna din aman oralǵanyn tileımin» deıdi PD bastyǵynyń orynbasary aǵynan jarylyp.
Eske sala keteıik, biz osyǵan deıin Túrkistan oblysynda 7 adamnyń joǵalyp ketkenin jazǵan edik.
Sondaı-aq izdeý jumystaryna tikushaq jumyldyrylǵany aıtyldy.
Keıinnen joǵalǵan jeti týrıstiń úsheýi aman tabylǵan bolatyn.
