Túrkistan taýlarynda týrısterdiń joǵalýy: Ómirzaq Shókeev birqatar tapsyrma júktedi
TÚRKІSTAN. QazAqparat - Túrkistan oblysynyń ákimi Ómirzaq Shókeevtiń tóraǵalyǵymen ótken apparat otyrysynda Tólebı aýdanynyń Saıram-Ógem memlekettik ulttyq tabıǵı parkiniń aýmaǵynda 7 adamnyń joǵalýyna baılanysty sońǵy málimetter baıandaldy, dep habarlaıdy QazAqparat tilshisi.
Óńirlik Tótenshe jaǵdaılar departamentiniń basshysy Nurǵalı Júnisovtiń málimdeýinshe, taýda joǵalyp ketken týrıster tobyn izdestirý jumystary kúndiz-túni júrip jatyr. Oǵan qutqarýshylar, polıtsııa qyzmetkerleri, shekara qyzmetiniń at patrýli, ulttyq park qyzmetkerleri, alpınıster, jalpy 100-den astam adam qatysýda.
«Sondaı-aq 2 tikushaq, 4 pılotsyz áýe quraldary, 15 tehnıka, qutqarýshylardyń 2 kınologııalyq qyzmeti, psıhologtar, jedel-járdem qyzmeti jumyldyrylǵan. Almaty qalasynan kómekke kelgen azamattar pılotsyz ushý quraldarynyń kómegin usynyp, túngi ýaqyta izdestirý jumystary júrgizildi. 30 mamyr kúni Qazaqstan jáne Ózbekstan Tótenshe jaǵdaılar mınıstrlikteriniń ekijaqty kelisimi boıynsha Óbekstan Respýblıkasynyń qutqarýshylary óz aýmaqtarynda Ógem ózeni boıynda izdestirý jumystaryn bastady», - dedi TJD bastyǵy.
Oblys ákimi Ómirzaq Shókeev mundaı jaǵdaılardyń aldyn alý jáne aldaǵy ýaqytta boldyrmaý maqsatynda jaýapty basshylarǵa tıisti tapsyrmalar berdi. Taýly aımaqtarda qaýipsizdikti qamtamasyz etý sharalaryn kúsheıtýdi júktedi.
Eske salaıyq, Túrkistan oblysynyń taýlarynda 7 adam joǵalyp ketken bolatyn. Sondaı-aq izdeý jumysyna tikushaq jumyldyrylǵany habarlandy. Joǵalǵan jeti týrıstiń úsheýi aman tabyldy. Eki kúnnen keıin taǵy eki stýdenttiń denesi tabyldy.