Túrkistan sharýalary 10 myń gektarǵa jýyq alqaptan bir jylda 2-3 ret ónim almaqshy

ASTANA. QazAqparat – Túrkistan oblysynyń sharýalary 9303 gektar alqapta «Bir alqaptan jylyna 2-3 ónim alý» jobasyn iske asyrmaqshy. Bul týraly óńir ákimi Darhan Satybaldy ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Óńirdiń aýyl sharýashylyǵynda ónim kólemi 5 jylda 2 ese artyp, alǵash ret 1 trln teńgeden asty. Agroónerkásip keshenine jalpy 336 mlrd teńge ınvestıtsııa tartylǵan», - dedi ol.

Aıtýynsha, salada jańa tehnologııalar keńinen qoldanylyp keledi.

«Qarqyndy baý kólemi bıyl 5405 gektarǵa jetkiziledi. Nátıjesinde ónimdilik 5 ese artyp, 300-350 tsentnerge deıin ónim jınalady. Sý únemdeý tehnologııasy 28 763 gektarǵa, «Bir alqaptan jylyna 2-3 ónim alý» jobasy 9303 gektarǵa endirildi. Atalǵan tásil aǵyn sýdy 2 ese únemdeýge, ónimdilikti 3 esege deıin arttyrýǵa múmkindik beredi. Respýblıkadaǵy jylyjaılardyń 71% bizdiń oblysqa tıesili. Jalpy kólemi 1511 gektarǵa jetti», - dedi Darhan Satybaldy.

Sondaı-aq, ákim 2027 jylǵa deıin 500 gektarǵa jańa jylyjaı salý josparlanǵanyn aıtty.

«Egistikti ártaraptandyrýdyń nátıjesinde 3 mln tonna kókónis, baqsha, kartop ónimderi jınaldy. Naryqty otandyq ónimdermen qamtamasyz etý úshin bıyl 60 jobany iske asyrý josparlansa, búgingi tańda sonyń 16-sy iske qosylǵan», - dedi oblys ákimi.